Инкуазь кужым сётэ, кырӟан шумпоттэ

Кузпалъёс вордскем палъёсазы Свердловск улосвылысь бертӥллям. Олинка Гарафисламовна пумтэм шумпотэ, ас дыраз бадӟым городэз гуртлы воштӥзы шуыса. «Вазь тулысысен бер сӥзьылозь садмы чебересь сяськаос пӧлын луэ, бакчамы узыр сиёнэн шумпоттэ, гужем тылобурдо басьтӥськом, кыре губияны, узы-боры бичаны ветлӥськом», - вера кузё кышно со пумысен. Рахимзянов кузпалъёс туж ярато губияны. Кылем арын соос сю банкалы матэ пӧртэм губи дасяллям. Тол куазен со – зэмос узырлык. Олинка Гарафисламовна губилэсь солянка но лэсьтэ, ческыт перепеч но пыже...

Олинка Гарафисламовна гуртэ бертыса уж сюрессэ Нанядыысь фельдшерско-акушерской пунктын кутскиз. Татын со 30 ар ӵоже тыршиз. Нош кузпалыз гурт удысын ужаз: со «Восток» хозяйствоын пудо утись но вал, учетчиклэсь но ужзэ быдэсъяз. Табере кузпалъёс кыкназы но пенсиын шутэтско, быгатэмзыя Елена но Регина нылъёссылэн семьяоссылы юрттӥсько. Туннэ нуналэ соос асьсэлэн семьяосынызы ке но уло, атай юртазы ӵемысь вуыло. Рафик Ульмасовичлы нылъёсын удалтӥз. Со – кык нылъёслэн яратоно атайзы гинэ ӧвӧл, ньыль внучкаосызлэн гажано ӵужатайзы но. «Внучкаосмы эктыны ярато», - вера Олинка апай соослэсь туспуктэмъёссэс возьматыса. Рахимзянов кузпалъёслэн асьсэлэн но улонзы табере кырӟан-эктонэн герӟаськемын. Соос пенсие потэмзы бере мӧзмыса уг уло, Вуж Варашысь культура юртысь «Югдон» ансамбле ветло. «Республикаысьтымы пӧртэм ёросъёсы вуылӥмы ни, Удмурт Элькунысь, Марий Элысь сцена вылын кырӟаны-эктыны кылдӥз», - вера Олинка апай. - Нырысь «Югдон» ансамбле огнам гинэ ветлӥ, берло кузпалы но кутскиз. Табере репетицие ваземзэс возьмаса гинэ улӥськом».  Олинка Гарафисламовналэн тодэ ваёнъёсаз берытсконо ке, со фельдшерын ужан аръёсаз ик сцена вылэ потам. Соку ёросысь удмурт эмчиослэн нимысьтыз ансамбльзы вань вылэм. Соос пӧртэм ужрадъёсын учкисьёсты шулдыртӥллям. Аръёс ортчыса ансамбльзы бырем ке но, Олинка Гарафисламовналэн кырӟан-эктон мылкыдыз сӥямтэ.

Нанядыысь фельдшер ужан аръёсаз но, со бӧрсьы но трос калыкез ӟеч мылкыдыныз бордаз кыске. Со сяна, нимыз но солэн аспӧртэм. «Мынам ӵужае Чиндэрысь вал, - вера Олинка апай. – Солы Олинка нимо удмурт ныл туж кельшем. Солэсь нимзэ берло мыным сётэм, нылыз чебер, шудо мед будоз шуыса». Олинка Гарафисламовна уг ваты, ӵужаезлэн  малпанэз быдэсмиз шуыса. Туннэ со – шудо кышномурт. Солэн малпамезъя, шуд со - тазалык но выль нуналлы шумпотон.