Сюлэмез бугырто малпанъёс но тодэ ваёнъёс

Со трос калыкез огазеяз: ужрадэ Ренат Биктимировичлэн эшъёсыз, тодмоосыз, ӵыжы-выжыосыз люкаськизы. Соос ваньзы ӵошен Россия Федерациысь гурт удысысь дано ужасьлэсь, куасэн бызьылонъя СССР-ысь спортъя мастерлэсь, дано кивалтӥсьлэсь, мерлыко (общественной) ужез нуисьлэсь 75 арес тырмонзэ пусйизы. Та нуналэ Ренат Биктимирович сярысь трос шуныт кылъёс чузъяськизы. Солэн ортчем дано сюресэз сярысь веразы адӟытонын возьматэм туспуктэмъёс, медальёс, кубокъёс но трос мукетыз. Соосты калык шумпотыса учкиз. Со вакытэ кин ке тодаз ваиз, дыр, «Дэмен» хозяйствоын ужам аръёссэ, мукетыз – «Шулдыр ӝыт» ансамблен пӧртэм ёросъёсы концертъёсын вуылэмзэс, куинетӥез – куасэн ӵошатскемзэс.

Ренат Биктимировичез буре ваён ӝытын тодэ ваёнъёсынызы люкиськизы трос аръёс ӵоже артэ вамыштэм эшъёсыз Удмурт Элькунысь Кун Кенешен кивалтӥсьлэн воштӥсез Т. В. Ишматова, БР-ысь Кун Собранилэн-Курултайлэн депутатэз К. С. Ямалетдинов, Камсьӧр удмуртъёслэн огазеяськонэнызы кивалтӥсь Ф. А. Чибышева, БР-ысь удмуртъёслэн национально-культурной центрзылэн Янаул ёросысь филиалэныз кивалтӥсь Ю. С. Саитов, республикаысь удмурт огазеяськонлэн ёзчиез С. Г. Гарифуллин но мукетъёс. Р. Б. Галямшинлэн улон сюресэныз пыр-поч тодматӥз удмуртъёслэн историяя но культурая центрзылэн нырысетӥ кивалтӥсез Т. Н. Шайбакова. Солэн кылъёсыз Ренат Биктимировичлэсь быдэс улон но уж сюрессэ син азе пуктӥзы. Куноос ваньзы сямен бадӟым тау каризы дано удмуртлэн кузпалызлы, Расима апайлы, солы йыгмыт вамышъёсын азьпала вамыштыны юрттэмез понна.

Буре ваён ӝыт куинь часлы матэ кыстӥськиз. Озьы ке но нокин ӧз шӧды дырлэсь быземзэ. Татын сюлмысь тодэ ваёнъёс но чебересь кырӟанъёс-эктонъёс огазе пӧлэстӥськизы. Сцена вылысен шӧдӥськиз, Ренат Биктимировичлэн калыкезлэсь лулчеберетсэ, кылзэ утён сярысь сюлмаськемез юнме ӧвӧл. Солэн кутскем ужез азинтӥське: лулчеберетмы данъяськымон вылӥын, вӧсьёсмы улӟытэмын, кылмы утемын.

«Мон данъяськисько удмурт луэменым», - сцена вылысен вераз Ренат Биктимировичлэн Элина внучкаез. Со песятаезлы удмурт калык эктон дасям. Туж потэ вылэм Ренат Биктимировичлэн нунокезлэсь удмурт эктонзэ учкемез. Нош Рената внучкаез солы кылбур кузьмаз.

Та нуналэ Ренат Биктимирович залэ люкаськем адямиос пӧлын ӧй вал ке но, татысь котькин солэсь кужымзэ, калыксэ гажамзэ шӧдӥз. Башкир удмуртъёслэн дано пизы бадӟым экранысен матысьёсыз шоры тау карыса учкиз кадь.