Аслаз калыкез сярысь сюлмаськонэн улӥз

Ренат Галямшин 1949-тӥ арын 28-тӥ тулыспалэ Татышлы ёросысь Арибаш гуртын вордӥськиз. Пичи дырыз секыт вакытэ тупаз – та дыре Быдӟым Атыкай ожлэн пытьыосыз шӧдӥсько на вал угось. Соин Ренат Биктимировичлы быдэ вуэмезлэсь азьвыл ик пӧсяса ужано луиз. Со вакытэ вордскем гуртэз вӧзын Кардон-Арибашын лесхоз ужаз. Чылкак татын ик кутскиз солэн кыдан дырыз. Егит пи станок сьӧры йыг-йыг султӥз. Со татын кема аръёс ӵоже тыршем воргоронъёсын ӵошатскыса сямен ужаз. Солы гурт ужез шӧдыса будэмез, пичиысен спортэн эшъяськемез юрттӥзы, кожалод. Озьы ке но Ренат Биктимировичлэн сюлэмыз паськыт бусыосы но лудъёсы куриськиз. Кема малпаськыса ӧз улы, документъёссэ Дуванысь гурт хозяйствоя техникумлэн агрономияя ёзэтаз сётӥз. Татын ик солэн кужмо куасчи луэмез шӧдӥськиз – Ренат Галямшин республика ӵошатсконъёсысь но бадӟым вормонъёсын бертылӥз.

Егит агроном ужзэ Татышлы ёросысь «Социализм» колхозын кутскиз. Кӧня ке дыр ӵоже татын ужамез бере шӧдӥз: быгатонлыкъёсыз паськыт. Соосты ужын валаса кутон понна, одно ик тодон-валанзэ будэтоно. Таӵе малпанэн со Гурт хозяйствоя башкир институтлэн агрономияя факультетаз вуиз. Зэмзэ но, Ренат Биктимирович татын трос визьбур басьтӥз, азьланяз сое уж дураз быгатыса кутӥз. Та вакытэ Р. Галямшин яратоно куасъёсыныз но ӧз люкиськы. Куас сюрес сое нуналысь нуналэ мургес гочатӥз. Ренат Биктимирович интститутлэн командаеныз ӵош Совето Союзын ортчись ӵошатсконъёсы пыриськылӥз. Тыршемез юнме ӧз луы – шаплы куасчи СССР-ысь спортъя мастер луиз, республикаысь Егитъёслэн политиказыя но спортъя министерство сое «За вклад в развитие спорта в Республике Башкортостан» гадьпусэн данъяз.

Институт бере Ренат Галямшин азе паськыт сюресъёс усьтӥськизы. Нош со бырйиз тужгес матынзэ, дор палъёсаз вуттӥсьсэ. Егит ӧнерчиез ёросысьтызы «Урал» колхозэ агрономе ужаны кутӥзы. Зэм, татын солы кема ужаны ӧз кылды. 1981-тӥ арын райком Р. Галямшинэз «Дэмен» колхозэ кивалтӥсе бырйыны ӵектӥз. Колхозын ужасьёс егит агрономлы оскизы, ваньзы огкылысь со понна куаразэс сётӥзы. Ренат Галямшин нырысетӥ нуналэ ик выль ужез борды саессэ пужалтыса кутскиз: кулэ ке, тракторлэсь капотсэ усьтоз, сеялка тупатонлэсь но уз курда. Со нуналысь нуналэ жадёнзэ валатэк тыршиз, котьмалы ӟигарыз тырмиз. Та вакытэ «Дэмен» Татышлы ёросысь гинэ ӧвӧл, быдэс республикаысь одӥгез кужмоез хозяйство луиз. Татын ю-нянь но удалтӥз, пудо сиён дасянэн, йӧл кысконэн герӟаськем лыдпусъёс но шӧдскымон ӝутскизы. Нош 1986-тӥ арын хозяйстволэсь вормонъёссэ ВДНХ-ын возьматӥзы.  Та вакытэ со одӥгез тужгес бадӟым вормон вал. Ренат Биктимирович лэсьтэм уженыз гинэ ӧз буйгатскы, ӝоген со Выль Татышлые культура юрт, школа, бригадаосазы нылпи сад, магазин, клуб  но мукет та выллем юртъёс ӝутыны кутскиз. Со сяна, Майске пересьёслы юрт пуктӥзы. Гуртъёсын но выль коркаослэн лыдзы йылӥз – калыклы секыт уж борды кутскыны колхоззы юрттӥз.

Ренат Биктимирович трос уж ке но быдэстӥз, ачиз сярысь трос вераны ӧз яраты. «Калык ӧй оскысал ке, 28 ар ӵоже гурт хозяйствоен ӧй кивалтысал, - шуылӥз со. – Ужтэк номыр уг луы. Озьы ик дышетӥсько егитъёсты. Пичиысен мед адӟозы, кызьы нянь будэ, кызьы йӧл потэ». Р. Галямшин котьку нылпиос, соослэн вуонозы сярысь сюлмаськиз. Пӧртэм ӵошатсконъёсы  трактор прицепын ветлӥсь пиналъёсты адӟыса но солэн сюлмыз сюлмыз йылсо венен бышкиськиз кадь. Соку кивалтӥсь азяз бадӟым ужпум пуктӥз: «Школалы автобус басьтоно». Малпанэз быдэсмиз. «Дэменлэн» кивалтӥсез Бигиней шор ёзо школалы спортын но мукет вормонъёссы понна автобус кузьмаз. Ренат Биктимирович дышетскисьёслэсь быгатонлыксэс усьтон но возьматон сярысь туж сюлмаське вал угось. Соин, вылды, соос понна жаль таӵе бадӟым кузьым но ӧз поты. Нош кыӵе шумпотӥзы пиналъёс но дышетӥсьёс та кузьымлы, соин ик солы ним но «РенБик» сётӥзы.

Ренат Биктимировичлэн ортчем сюресаз трос ӟеч ужъёс, трос кибервылъёс кылемын. Озьы ке но со одӥгзэ льӧль малпанзэ со быдэстыса ӧз вутты.

- Нылпиослы спортъя школа кылдытэме потэ вал, - шуиз со одӥгаз пумиськонамы. - Пичиысен мыным валъёс кельшо. Нылпиослы ипподром ӝутыны малпанэ вань вал. Туж потэ соосты конной спортын адӟеме. Спорт адямиез кужмо каре, секытлыкъёсты вормыны дышетэ. Кышкасьтэм, сэзь, капчи мылкыдо луыны юрттэ. 

Зэмзэ ик, егит дыръя Ренат Биктимирович ворттӥсь валъёсты но уйылыса сутылӥз. Нош ортчись аръёсты уд ни суты вылэм…

Кивалтӥсьлэсь сюлмысь тыршемзэ котьку вылӥ дунъязы. Солы, кылсярысь, «Россия Федерациысь гурт удысысь сӥё-дано ужась» ним сётэмын. Со сяна, со Башкортостан республикаысь Кун Собранилэн -  Курултайлэн Данъян грамотаеныз пусъемын.