Уг вуно ож сярысь малпанъёс

Со улсын шаерамы трос ужрадъёс ортчизы. Школаын дышетскисьёс понна но афган ож пыр потэмъёсын пумиськонъёс радъязы. Удмурт Республикаысь Завьял ёросысь Хохряки гуртысь школае Владислав Минеахметов вуылӥз. Вераны кулэ, Владислав Минзариповичез афган ожлы сӥзем ужрадэ школае арлы быдэ вазё, со дышетскисьёслы ож лудын луэм учыръёсыз сярысь маде, веранъёсыз пыр вордскем музъемез гажан мылкыд пыӵатэ. Пиналъёс доры со армиысь фотоальбоменыз вуиз. Нылъёс но пиос котькуд туспуктэмез тунсыкъяськыса учкизы. Со сяна, В. М. Минеахметов пиналъёсты служба аръёсаз кылзэм кырӟанъёсыныз тодматӥз.

Владислав Минзарипович Татышлы ёросысь Арибаш гуртын 1960-тӥ арын дышетӥсьёслэн Кафия Гадиятовна но Минзарип Минеахметович Минеахметовъёслэн семьяязы вордӥськем. Со куинетӥ нылпи луэм. Арибашын ортчем солэн пичи дырыз. Гуртысьтыз тямыс классъем школаез йылумъяса, Вылысь Татышлыысь шор ёзо школаын дышетскем. Бӧрысь Кунгурын автотранспортной техникумын тодон-валан басьтэм.

Служба аръёсыз В. М. Минеахметовлэн афган ож вакытэн тупаллям. Со СССР-ысь Верховной Советлэн Президиумезлэн грамотаеныз пусъемын, нош воин-интернационалистлэн мӧля вылаз юбилейной медальёсыз чиляло: соос советской войскоосты Афганистанысь поттэмзы дырысен 20, 25, 30 ар тырмонлы сӥзьыса сётэмын. «Экемы армиын дыръя анайлы туж секыт вылэм, дыр, - вера Владислав Минзариповичлэн апаез Светлана Сабанчина. – Ёрос военкоматлэн документъёсызъя, Владислав ивортэк ышемъёс пӧлын лыдъяськем. Соин СССР-ысь Верховной Советлэн Президиумезлэсь грамотазэ солы трос аръёс ортчыса гинэ сётӥзы»

Минеахметовъёс кема аръёс ӵоже Пермь шаерысь Чернушкаын улӥллям. Отын но Владислав Минзарипович афган ожлы сӥзем ужрадъёсы ӵем пыриськем. «Али соос Удмуртиын уло. Куинь пиоссы Ижевске улыны интыяськизы, соос вӧзы кариськемзы потӥз», - вера Светлана Минзариповна.

Афганистанын луэм боевой действиосысь ветеран Владислав Минзарипович школаын, ёросазы ортчись ужрадъёсы ваземзылы тау кылъёссэ вера. Шумпотэ, куке но ожмаськыса шаерез утисьёсты уг вунэто шуыса. Оло, матысь дыре вордскем гуртаз, дышетскем школаяз но со вуылоз, афган музъемын адӟем кышкытлыкъёс сярысь мадёз.

Фото: МБОУ "Хохряковская СОШ"