Огъя кужымен кивалтӥсь юнма, азьлань мынэ

 Кылдэм дырысеныз трос аръёс ортчемын, кивалтӥсьёс но вошъяськемын, нош хозяйство кутскем ужзэ азьвыл сямен ик данъяськымон быдэсъя. Туннэ нуналэ СПК-ын 100-лэсь трос ужасьёс тыршо. Хозяйствоын пудо вордон кык фермаос: одӥгез Вуж Вараше интыяськемын, кыкетӥез – Нанядые. Фермаосын огъя 500 кысконо скалъёс лыдъясько. Туннэ нуналэ одӥг скал шорлыдын 21 литр йӧл сётэ. Хозяйство суткаяз огъя 11 тонна йӧл кыске. Востокъёслэсь йӧлзэс «Югорской комбинат молочных продуктов» ООО арняяз кык пол нуллэ, кылем вить нуналъёсы «Ува-молоко» ООО вуылэ.

Вераны кулэ, хозяйстволэн пудо утён удысаз учкымон но данъяськымон адямиос ужало. Кылсярысь, «Триумф-2023» ёрос конкурслэн йылпумъянъёсызъя, «Гурт удыс» ӧрын Евгений Зайнуллин вормисе потӥз. Ӧнерчи трос аръёс ӵоже Вуж Варашысь фермаен кивалтэ. «Колхоз Восток» СПК-лэн вить сюрс гектар музъемез лыдъяське. Отысь хозяйство арлы быдэ трос ю-нянь басьтэ. Кылем сӥзьыл бусыосысьтызы октэм юлэн удалтонлыкез гектарысьтыз шорлыдын 16 центнерен усем. Озьы ик хозяйство ужан техниказэ выльдон сярысь сюлмаське. Кылсярысь, кылем арын огъя 51 млн 317 сюрс манет тыр техника басьтэмын. Уждун пумысен «Колхоз Восток» СПК-ын ужасьёс уг ӝожтӥсько. Улыны тыршисьёс, асьсэ ужзэс учкымон быдэсъясьёс татын коньдонлы уг паймо. Туннэ нуналэ хозяйствоын ужасьёслэн уждунзы шорлыдын 35 сюрлэсь трос луэ.

Олег Зайнуллин усто кивалтӥсь гинэ ӧвӧл, семьяез но солэн учкымон. Кузпалэныз Галина Владимировнаен соос кык нылъёссэс будэтӥзы. Нылъёссы асьсэлэн семьяосынызы уло ни. «Институтысен ини нылъёс пӧлын улӥсько. Пие ӧвӧл, кык чебересь нылъёсы вань, внучкае будэ. Ужын но кышномуртъёс пӧлын тыршисько», - серекъяса шуэ Олег Валиханович. Нош пичи дырыз солэн кык вынъёсыныз ортчем. Анай-атаез вазь ӵукнаысен бер ӝытозь уж дуразы тыршиллям. Соин ик вынъёссэ учкыны но утьыны солы кылем. Туннэ нуналозь но куинь вынъёс уг люкисько. Олег Валихановичлэн вынъёсыз но улонзэс вордскем гуртысьтызы хозяйстволы сӥзизы: Евгений Зайнуллин Вуж Вараш фермаен кивалтэ, Алик Зайнуллин татын ик водитель луыса тырше. Ужась калык но кивалтӥсь огинэ луыса тыршизы ке, азьпалан «Колхоз Восток» СПК-ез бадӟымесь вормонъёс возьмалозы на. Угось хозяйство одӥг адями бордын гинэ уг возиськы, калыкен ӵош кивалтӥсь юнма, азьлань мынэ.