Крезьгурен но спортэн эшъяське

Со ӟеч тодон-валанэныз висъяськемез сяна, школаын, ёросын, республикаын ортчоно ужрадъёсы пыриське, предметъёсъя олимпиадаосын кужымзэ эскере. Кылсярысь, туэ дышетскон арын ОБЖ-я олимпиадаын муниципал этапын вормисьёс пӧлын луиз. ОБЖ - Станиславлэн одӥгез яратоно урокез. Шаплы, визьмо пияш пичи дырысеныз спортэн эшъяське. «Волейболъя секцие куинетӥ классысен ветлӥсько. Арняяз куинь пол тренировкаос луо. Александр Иванович Сабанчин кивалтэм улсын волейболъя пӧртэм ӵошатсконъёсы пыриськиськом, ӵемысь вормисьёс пӧлын луиськом», - вера Станислав.
Станислав Низамовез сцена вылысь но ӵем пумитаны луэ. Со Выль Татышлы культура юртысь «Шулдыр ӝыт» калык ансамбле ветлэ. Нош Вылысь Татышлыысь нылпиослы искусствоосъя школалэн Выль Татышлыысь филиалаз со кыкетӥ классысен ни тодон-валан басьтэ. Станислав крезьгуро инструментэн – балалайкаен - шудэ. Та ӧръя дышетсконзэ кылем арын йылпумъяз ке но, крезьгур дуннеен люкиськыны уг малпа на. Кивалтӥсезлэн Фридман Кабипяновлэн кичӧлтэмезъя лулчеберет удысын радъяськем ужрадъёсы, конкурсъёсы пыриське. Кылсярысь, «Таланты Башкортостана» онлайн-конкурсын, кудаз Станислав эшъёсыныз пыриськиз, быгатонлыксэс куинетӥ степенё дипломен пусйизы. Со сяна, та конкурсэ Станислав Низамов «Соло» номинациын но пыриськиз. Пияш кыкетӥ степенё дипломлэн кузёез луиз.
Туэ Станислав укмысэтӥ классэз йылпумъя. Азьпалан со дышетсконзэ Нефтекамскын азинтыны малпа.