Ужедлэн емышъёсыз данъяськымон мед луозы

Калтасы ёросысь Чиндэр гуртын вордӥськем но отын ик быдэ вуэм Лидия Минзариповна, школазэ йылпумъяса, Благовещенскысь педучилищее дышетскыны пырем. Отысен дипломен дышетӥсез Янаул ёросысь Наняды гуртэ ужаны ыстӥллям. Озьыен, 1985-тӥ арын егит ӧнерчи быръем удысаз нырысетӥ вамыш лэсьтэм. Нанядыысь школаын Лидия Фёдорова кема ужамтэ. Улонлэн куронъёсызъя, Шудек школае покчи классъёсысь нылпиосты дышетыны вуэм. Со дырысен туннэ нуналозь но дышетӥсь ужан интызэ вошъямтэ ни.

Лидия Минзариповналэн кылъёсызъя, зэмос дышетӥсь луыны капчи ӧвӧл. Угось пичи нылпи тынэсьтыд мылкыддэ ӧсэз усьтыса пыремез бере ик шӧдэ.

- Пичиосты яратон мылкыды котьку монэн ӵош вамышъя. Нылпиосты гажатэк, школаын ужаны уг яра. Пичильток пӧяськыны уг быгаты, со вань ӟырдыт яратонзэ омыртыса ик дышетӥсьлы кузьма. Сыӵе ик мур гажан мылкыдэз нылпилы но берыктоно. Соку гинэ пинал тонэ валалоз, сётэм тодон-валандэ бордаз пыӵатоз, - вера Лидия Минзариповна.

Шудек школаын ужаны кутскемез дырысен дышетӥсь кык классэн ужам.

- Таӵе ужез тодӥсьёс гинэ монэ валалозы. Кык классэн ужаны туж шуг. Одӥг класслы валэктыку, кыкетӥез я кырӟаны, я тэтчаны кутске ини. Нош нылпиос шоры куараез будэтыса гинэ югдурез уд вормы: соосын одӥг кыл шедьтыны кулэ. Тодӥсько на одӥг учырез. Туж шаплы нылпиос соку шедизы, вераськемысь но уз дугдэ вал. Мон соослы кескич план малпай. Шуисько, мон валэктыку ваньды мынам ым шоры гинэ учкыса улэ, нокытчы но синъёстэс эн вошъялэ. Нылпиос огвакыт шыпыт улӥзы, весь ымам учкыса кылзӥзы. Нош огвакыт тужгес но шаплыез пияш шуэ, мон, пе, туж кема тырши ымады учкыны, нокызьы но ӧз пӧрмы. Ымды шоры учкисько ке, вань бамды, пе, адӟиське. Соку ини нылпиос гинэ ӧвӧл, мон но быдэс урокез гор-гор серекъяса потӥ, - пальпотыса тодаз вае Лидия Фёдорова.

Лидия Минзариповналэн дышетэм нылпиосыз но учкымон адямиос луизы. Дышетӥсьлэн юн тодон-валан сётэмез бушлы ӧз кошкы. Дышетӥсьсэс то дазы вайыса, тау кылзэс верало стоматолог, невропатолог, педиатр, окулист луэм эмчиос но дышетӥсьёс. Лидия Фёдорова котькуд дышетэм нылпизэ али но тодаз возе. «Соос ваньзы аслам кадь пото. Соослэн вормонъёссылы шумпотӥсько, кайгузылы куректӥсько. Куке но мыным оскем сюлэмзы али но бордам улэ», - вера дышетӥсь.

Лидия Минзариповна Алек -сандр Гарифьяновичен кужмо семья кылдытӥзы. Ӵошен кык нылпиоссэс будэтӥзы. Туннэ нуналэ нуныоссы, асьсэлэсь шудзэс шедьтыса, улонын интыяськемын ини. Лидия Фёдоровалэн тыршыса ужамез Янаул ёрос администрацилэн грамотаосыныз трос пол пусъемын ини. Данъян кагазъёс огвакытлы гинэ шумпотон ваё, дыр. Нош аслэсьтыд ужедлэсь емышъёссэ данъяськымон адямиос бордысь адӟид ке, соку улонэд огшоры вылымтэ угось.