Киргаысь школаын мастер-класс ортчиз

Творчествоя огазеяськонъёсы пыриськисьёс сюрес вылын кышкытлыкъёслэсь утиськонъя ужрадъёсы, конкурсъёсы пырисько, асьсэос но ПДД-лы сӥзем ужрадъёс дасяло. Кирга гуртысь школаын ЮИД-лэн «Дорожный патруль» огазеяськонэныз Татьяна Ментемирова кивалтэ. Алигес Татьяна Игоревна 1-2-тӥ классъёс понна мастер-класс радъяз. Отын пиналъёс светоотражательёс лэсьтыны дышетскизы. Мастер-класс ПДД-лы сӥзем презентация, светоотражатель сярысь видеоролик учконэн кутскиз. Дышетскисьёс классэн кивалтӥсенызы Валентина Евгеньевна Шайсламоваен сюрес вылын ветлон куронъёсты тодазы ваизы, собере лэсьтӥськон борды басьтӥськизы. Фликеръёссылы соос ки выллем шаблон бырйизы. Лэсьтэм светоотражательёссы пеймыт дыръя пиналъёсты сюрес вылын шудтэм учыръёслэсь утёзы.

Кылем ар пумын Куеда ёросын «Безопасность на дороге – мой образ жизни» суредъёсъя ёрос конкурс ялэмын вал. Отчы Кирга школаысь 12 ужъёс вуизы. Конкурслы йылпумъянъёс лэстэмзы бере тодмо луиз: «Конкурс рисованных комиксов» номинациын вормисе потӥз Снежана Садиокова, «Рисуем безопасность» номинациын 2-тӥ интыын луиз Анжелика Гаптиева, куинетӥ интыын – Никита Разяпоов но Анастасия Хусниярова. Вормисьёсты но призёръёсты грамотаосын но коньдон кузьымъёсын данъязы, нош мукетъёс конкурсэ пыриськемзы понна сертификатъёс басьтӥзы.

Фото: ЮИД д. Кирга