Ожын бырем гуртоосты буре вайыса

Таныповкаос быдэстэм уженызы ӧз буйгатске. Табересоос «Программа поддержки местных инициатив» проектэ пыриськыны мылкыд каризы. Ужзы борды котьку сямен дэмен, кенешыса кутскизы. Соослэн малпанъёссы но ӧжыт вылымтэ. Нырысетӥ кенешонъёсы таныповкаос противопожарной пирс лэсьтон, ульчаязы ву кошкыны труба пуктонсярысь веразы. Остановочной павильон, спортивной площадка но гурт понна мултэс ӧй луысалзы. Нош толсур толэзьлэн берпуметӥ нуналъёсаз ортчем кенешонын соос огкылысь веразы: «1941-1945-тӥ аръёсы Быдӟым Атыкай ожын быремъёслы обелиск пуктоно. Со гуртлэн кылдэмез дырысен 100 ар тырмонлы бадӟым кузьым луысал».

Берпуметӥ кенешонын инициативной группа бырйизы. Со 10 адямилэсь сылоз. Вормисе потӥзы ке, соос быдэстӥськем ужез чаклалозы, калыклэсь коньдон люкан бордын тыршозы. Нош та нуналъёсы таныповкаос ульчае скандинав вамышен ветлыны потало, пӧртэм шудонъёс радъяло. Соослэн кужымзы ӵошен ужаны но шутэтскыны быгатэмзы бордын.

Эдуард Рахимзянов,

Улысь Балтач гурт поселенилэн администрациеныз кивалтӥсь.