Нылпиоссы бордысь улонлэсь дунлыксэ адӟо

Янаул ёросысь Шудек гуртын улӥсь Римма Максимовна Асхатоваен вераськыны кутскем бере ик солэсь шуныт сюлэмзэ шӧдӥ. Котькуд кылме малпаса верано кадь потӥз мыным, угось со ненег сяська выллем, кожалод, секыт кыл сое кезьыт пужмер кадь жабыртоз.

Зӥбыт сямо, лякыт  кышномурт башкир музъем вылэ Удмуртиысь вуэмын. «Мон вордӥськемын но будэмын Кияса ёросысь Дубровск гуртын. Куспамы гуртмес Вукогурт шуиськомы вал. 10 классэз йылпумъяса, Башкириысь Кармаскалые вуи, отын техникумын бухгалтерлы дышетски. Дышетскеме сярысь документме киям басьтэм бере Сарапулысь Элеконд заводэ ужаны интыяськи. Ӵапак со вакытэ ик отын Янаул ёросысь Можга гуртысь нылъёс но тыршо вал. Соосын эшъяськыса, доразы куно ныл луыса вуи. Отысен ик вуоно кузпалэным Леонид Менсадиевичен тодматским. Нош 1973 арысь 14-тӥ южтолэзе Шудекысь ЗАГС-ын кусыпмес юнматӥм», - вера Римма Максимовна.

Со дырысен ӝыны даур ортчемын ини. Кузпалъёслэн кык нылпиоссы кемалась ини, быдэ вуыса, ас семьяосынызы уло, асьсэлэн нылпиоссы будо. «Туэ башкир музъем вылын улэме 50 ар луиз ини. Нош мынам али но син азям вордскем шаерелэн ӝужыт гурезъёсыз, жильыртӥсь ошмесъёсыз. Али но сюлэмы вордскем гуртэлэсь мӧзмыса бӧрдэ», - синкылиоссэ ватытэк маде кышномурт.

Кожалод, котькуд адями улэм интыяз дыше, нош сюлэм гинэ сое уг вала. Угось кышномуртлэн улонэз но секытэн ӧз ортчы. Кузпалэнызы ӵош ноку но ужатэк ӧз улэ: Леонид Менсадиевич колхозазы шофер луыса ужаз, Римма Максимовна гурт поселенизылэн адяминистрацияз бухгалтерен тыршиз. Нош шутэтскыны вакытэз вуэм бере, интыяз кензэ дышетыса кельтӥз.

«Улонэлы ӝожтӥськонэз но ӧвӧл кадь. Калыкен ужаса, ӵошен шутэтскыса кык нылпиосмес будэтӥм. Туннэ нуналэ ньыль нунокъёсмылы шумпотыса улӥськом», - шуэ Римма Максимовна. Нош со вакытэ ик кышномуртлэн синъёсыз синкылиен тырмо. Анаймуртлэсь одӥгез гинэ сюлэмзэ зибе, шоканы уг сёты: пиез ачиз мылкыд карыса нимысьтыз военной операцие кошкемын. «Телефонэн но шер жингыртэ. Мынам, анай, ваньмыз умой гинэ шуэ. Нош сыӵе интыын умой луоз шат? Уйин но иземе уг луы, мынам пие кынме, дыр, шуисько, нош мон шуныт валесын кӧлӥсько», - синкылиоссэ кутыны быгатытэк вера Римма Максимовна.

Туннэ нуналэ кузпалъёслэн Инмарлэсь одӥг куронзы: дор палаз тазалыкен мед берытскоз пизы. Сыӵе малпанэн соос ӵукна султо, ӝытазе кӧлыны выдо. Анай-атай понна нылпилэсь дуноез номыр но ӧвӧл угось. Соос бордын улонлэн дунлыкез но кулэлыкез.

Венера ИЛЬБАЕВА.