Чиндэрысь Маркап Гайназарова 100 арес тырмон юбилейзэ пусйиз

Маркап Гайназаровна улонысь вань секытсэ адӟиз, дыр. Жаляса верано, улон сюресэз капчи ӧз луы. Укмыс аресысен со анай-атайтэк кылиз. Воксё огназ кылем нылэз анаезлэн выныз дораз басьтӥз. Отын но шудэз кема ӧз луы. Ӝоген агаез но улонысь кошкиз. Соку ныл ӟенгаеныз улыны кылиз.

Шулдыр егит вакытъёсаз шудыны потыны чебер дӥськут но ӧз шедьы. Возьдаськеменыз, эшъёсыз шулдыръяськыку, Маркап Гайназарова лушкем дораз пукиз. Ӧжыт синву ӧз кисьты, дыр, егит ныл. Озьы ке но шуг-секытъёслы ӧз сётӥськы, улон борды гижыен ӝабыртӥськиз.

Ӝоген Быдӟым Атыкай ож кутскиз. Со вакытэМаркап Гайназаровна торф поттонын тыршиз. Вить ар отын ужаса, вордскем палъёсаз берытскиз, татысь парсь вордон фермае ужаны интыяськиз.

Маркап Гайназаровна ужлэсь ноку ӧз кышка. Со улонысьтыз одӥг минутсэ но ужтэк ӧз улы, дыр. Бадӟым Качакысь фермаын но скал кыскиз, Бурайысь фермаын но ужаны вутскиз.

Кышномурт шудэз но солэн ӧз удалты. Сюлэмезлы ярась егит пилы соин паръяськыны ӧз сётэ: анай-атайтэм, коркатэм нылмуртлэсь марзэ, пе, басьтод. Озьы ке но кык яратӥсь сюлэмъёслэн нылзы вордӥськиз. Утьыны но будэтыны гинэ сое нокин ӧз юртты. Улыны но коркаез умой ӧй вал. Аръёсын сисьмем коръёс висъёстӥ тӧл шулаз, лымы пелляз. Тупатыны пиосмурт киос ӧз луэ.

Огвакытэ, ма карыны паймыса, Маркап Гайназаровна эшеныз Сяськабей Кучербаеваен кыкназылы одӥг корка ӝутыны малпазы. Уж бере пеймытын пичи уробоен нюлэскысь кор ворттӥзы. Озьы каллен-каллен асьсэос пичи гинэ корка пуктӥзы. Отын ик быдэ вуиз одӥг гинэ нылыз.

Пенсие потыса, гань-гань шутэтскы вылэм, нош татын но кайгу сое шедьтӥз. Бурай ёросысь Давлеканово гуртэ бызем нылызлэн кузпалыз дырызлэсь вазь улонысь кошкиз. Кышномурт пичи нылпиосыныз огназ кылиз. Чидалоз шат анай сюлэм одӥг гинэ нуныезлы юрттытэк. 1991-тӥ арын Маркап Гайназарова Чиндэрысь кошкиз. Отын кызь ар ӵоже вордскем гуртэзлэсь мӧзмыса улӥз. Берло чиданэз быриз, лэся, вань  дӥсьёссэ тырыса, Чиндэре берытскиз. Вордскем гуртаз пырыны нош ик коркаез ӧй вал ни: нылыз доры кошкыкуз вузаса кельтӥз. Егит дыраз сямен ик улон сое нош ик отчы-татчы кысказ.

Со вакытэ, оло, Маркап Гайназаровалэн шудаз, внучкаез Чиндэре бызиз. Солэн юртаз ик пересь кышномурт аслэсьтыз шудзэ шедьтӥз. Туннэ нуналозь но со отын нылпиосызлы шумпотыса улэ. Солэсь сюлэмзэ одӥг нылыз, вить внукъёсыз но тямыс правнукъёсыз  шунто.

Маркап Гайназаровалэн кылъёсызъя, улон сое кыдатӥз. Висьыны но вакыт ӧз шедьы. Арлыдо кышномурт улоназ ноку но аптекаысь эмъюм ӧз юы, пыд улын будӥсь турын-куарен эмъяськиз. Туннэ нуналэ но Маркап Гайназарова эмъюмъёслы уг оскы. Та югыт дуннеын улыны, пе, гожтэм ке, уло ай, нош ӧвӧл ке, нокыӵе эмъюм уз юртты.

Бадӟым Качак гурт поселенилэн администрациеныз кивалтӥсь Г.Д. Хайдаршин аслаз но Калтасы ёрос администрациен кивалтӥсьлэн З.Т. Габдуллинлэн нымыныз Маркап Гайназаровнаез таӵе бадӟым юбилееныз ӟечкылаз.