Полилингвальной школаын анай кылзэс дышето, ӟучсэ, башкирзэ, англизэ но ӟеч тодо

 Та нуналъёсы Мишкиное Башкортостанысь финн-угор калыкъёслэн ассамбеязылэн конференцияз лыктэм делегатъёсты интыысь кыкетӥ номеро многопрофильной школаен тодматӥзы. Дышетон юрт туала куронъёсъя тупатэмын. Татын 439 пиналъёс тодон-валан басьто. Соос шумпотыса анай кылынызы верасько, башкир, ӟуч, англи кылъёсты дышето, калык культураенызы, сям-йылолъёсынызы тунсыкъясько. Школалэн директорезлэн Салават Мухаметович Мустафинлэн верамезъя, татын 439 пиналъёс дышетско. Соос пӧртэм конкурсъёсы пырисько, волонтёръёслэн уженызы тунсыкъясько.

Школаын  нылпиослэн калык культураенызы тунсыкъяськемзы киужъёссы бордысь но шӧдӥськиз. Соослэн асьсэ киосынызы лэсьтэм яркыт  чеберъяськонъёссы, синпель кузьымъёссы кемалы тодазы кылёзы. Нош анай кылынызы быдэстэм кырӟанъёссы кыӵе мусо кылӥсько! Школалэн коридоръёстӥз, висъетъёстӥз ортчыку, амалтэк удмурт кылмылэн, культурамылэн вуоноез сярысь малпанъёс йыре лыкто. Угось 2024-тӥ  арын Татышлы ёросысь Выль Татышлые удмурт кылэз мургес дышетонъя полилингвальной школа усьтӥськыны кулэ.