Шуныт кылъёсыд азьпала вамыштыны кужым сёто

Анаймы бадӟым семьяын будӥз. Со -  ньыль нылпиос пӧлысь бадӟымез. Соин, вылды, трос дыръя солы пӧртэм гурт ужъёсты ас вылаз шӧдоно луэм. Тужгес секыт йӧтэм атаез улонэн люкиськем бере – анаймылы соку 12 арес вылэм. Улонзы капчи ке но вылымтэ, анай Сарапулысь медициная колледже дышетскыны пырем. Зэм, сое йылпумъяны пӧрмымтэ. Анай, дасэтӥ классэ йылпумъямез бере, семья кылдытэм но Бигинейысь шор ёзо школаын удмурт кылъя но литературая урокъёсты нуыны кутскем. Со дыре ик библиотекаын но ужам. Бӧрысь со «Дэмен» СПК-е ужаны интыяськиз. Анаймы отын 29 ар ужаз. Берло 10 арзэ страховой компаниын тыршиз. Анаймы пӧртэм интыосын ке но ужаз, ми котьку тодӥмы: отын сое гажало, ужзэ вылӥ дунъяло.

Улон адямиосты пӧртэм шуг-секытъёс пыр кыдатэ, шуо. Анаймылы улон сюресаз трос шуг-секытъёс пыр потоно луиз. Соос атаенымы куинь нылпи вордӥзы. Но, жаляса верано, атаймы сое туж вазь огназэ кельтӥз. Анайлы милемыз будэтон, дышетон понна трос тыршоно луиз: уж дураз сяна, юрт котырысь ужъёсты но ваньзэ  дыраз лэсьтыны вутскиз, корка ӝутон борды но кышкатэк кутскиз. Со шуг-секытъёсты вормыса, ӟеч мылкыдын азьпала вамыштӥз. Пичи дырысен милемыз ужез, калыкез гажаны, ӟечсэ но уродзэ валаны дышетыса будэтӥз. Анай котьку уж пӧлын ке но бергаз, ми котьку солэсь сюлэм шунытсэ, яратэмзэ шӧдӥмы.

Милям анаймы, ӵужаймы но песяймы – чебер, ужез гажась удмурт кышномурт. Со вӧзын нылпиосызлы гинэ ӧвӧл, котькинлы шуныт. Туннэ анаймес сюлмысь ӟечкыласьком юбилееныз! Анай, тон кема аръёс ӵоже выль  нуналлы шумпотыса, висёнъёслы сётскытэк, нылпиосыдлэн вормонъёсынызы данъяськыса мед улод. Эн вунэты: малпанъёсын ми котьку тон вӧзын. Тынад шуныт кылъёсыд милемлы азьпала вамыштыны кужым но оскон сёто. Нылпиосыдлы оскемед, соосты валамед, дышетэмед понна ми тыныд котькуд нунал тау шуиськом. Тынэсьтыд небыт киостэ, шуныт синъёстэ номырин уд ӵошаты. Ми понна сос котьмалэсь дуно. 

Нылпиосыд, внукъёсыд.