Ку чебермам кызэз доре пуктоно

Нырысь ик магазинъёс чильк-вальк ӝуась гирляндаосын гочатыны кутско, берлогес коркаос но пиштӥсь тылъёсын шобырско. Нош кыӵе Выль ар луоз чебермам кызтэк? Угось со бордын ик праздниклэн шӧмыз возиське.

Берло дыре Интернет вотосэз учкытэк вамыш но уд лэсьты. Кызэз пуктон ласянь но отын туж трос валэктонъёс сётэмын. Озьыен, нюлэс чеберинае нуналзэ тодыса шудонъёс тырид ке, быдэс арез вӧй вылын сыр выллем улод.

Интернет вотослы оскид ке, тужгес но умой, пе, кызэс пуктыны 18-тӥ декабре, Николай Чудотворецлэн нуналаз, яке 22-тӥ декабре, ку тужгес но вакчи нунал но тужгес но кузь уй луэ, яке 24-тӥ декабре григорянской календаръя Рождество азьын, яке 27-тӥ декабре, каталической Рождествое, яке 28-тӥ декабре, Святой Трифанлэн нуналаз. Нош Башкортостан Республикаын  тросэз удмуртъёслэн  осконзы язычествоен герӟаськемын. Соин ик асьме калыкмы та выллем календарьёс шоры уз учкы, дыр.

Со сяна, кызэз тодыса чеберманы, пе, кулэ. Со бордын одно ик вулэн, тыллэн но музъемлэн тусъёссы луыны кулэ. Озьыен, нюлэс чеберинамы одно ик чагыр, горд но курень тусо шаръёсын мед кильтыръяськоз. Малы шаръёсын шуи? Малы ке шуоно кыз бордын лэчыт пумо шудонъёс луыны, пе, кулэ ӧвӧл. Соку улонэд но шар выллем вольыт луоз.

Озьы ик кызэз кудпала пуктыны тодэм но мултэс, пе, уз луы. Кылсярысь, уйпала интыяд ке, вуоно арын одно ик уж дурын умой пала воштӥськонъёс луозы, нош корка шорын сылӥсь кыз кузёослэсь тазалыксэс юнматоз.

Ваньзэ тае оскыса радъяд ке, оло, зэмзэ но чебермам кыз вуоно арын шудбур но узырлык ваёз. Нош кин уг оскы, туннэ но умой луоз корка кызэз пуктыны. Угось соку нылпиослэн гинэ ӧвӧл, котькинлэн но мылкыдыз вуоно праздникен пыӵалоз.