Радий Хабировлэн анаез мошенникъёслэн куриказы шедем

«Россия» телеканалысь журналист Башкортостан Республикалэн тӧроезлы тунсыко юанэн вазиськиз. Вань-а, пе, Тӥледлы мошенникъёслэн жингыртэмзы, кыӵе амалэн Тӥ соосын нюръяськиськоды?

Юанлы валэктон сётыса, Р.Ф. Хабиров улонысьтыз учырзэ вераз: «Москваын ужакум, анае пӧяськисьёслэн куриказы шедиз. Уйин сайкаса, телефонам  учки но, вынылэн 20 пол жингыртэмез сярысь ивор лыктӥз. Анаймы висьыны усем, дыр, шуыса малпай. Нош отын воксё мукет муг вылэм. Бер ӝыт анаелы жингыртӥллям но монэ, кинэн ке  жугиськемен  сэрен , полицие нуиллям шуыса вераллям. Мозмытон понна 300 сюрс манет куриллям. Анае быдэс улонзэ госслужбаын ужамын ке но, мошенникъёслы оскем. Соку ик вань коньдонзэ люкаса, пӧяськисьёслэн курем интыязы нуыны малпам. Ярам, вынылэн соку йырыз вакытаз малпаны быгатэм. Оло анае берло коньдонзэ но мошенникъёслы сётысал».

 Оло со дырысен, оло ужез сыӵе луэмен Радий Фаритович тодмотэм номерен жингыртӥсьлы уг вазьы. Озьы ик республикаямы улӥсьёсты но пӧяськисьёслэсь утиськыны куре. Угось котькуд коньы кужымен но тазалыкен адямилы лыктэ.