Сям-йылолъёс туала улонэ пыӵало

Сям-йылолъёсты утьыса но азинтыса, калыклэн вуоноезлы оскыны луымон. Угось вашкала дырысен асьме нуналозь вуэм йылолъёс калык выжыосты юнмато, туала егитъёсты азьлозэ гажаны но азинтыны дышето.

Удмурт калык азьло дырысен тулыс но сӥзьыл кистон ортчытэ. Сям-йылоллэн вашкала шӧмъёсыз тросэз ышемын ке но, туала арын сое уг кушто, ас валамзыя ортчытыны тыршо.

Калтасы ёросысь Бадӟым Качак гуртын одӥг коркаын но та йылолэз пусйытэк уг кельто, дыр. Кин ке, кулэмъёсты тодаз вайыса, аспонназ гинэ ортчытэ, нош мукетыз ӵыжы-выжыоссэ, эшъёссэ, тодмооссэ чай юыны вазе. Кылсярысь, азьло вакытъёсы кисьтонэ огвыжыысь потэмъёсты гинэ вазьылӥллям. Котькудӥз ас выжыосыныз тылобурдо сӥлен пӧзьтэм шыд сиыса но пыжиськемъёсын чай юыса ветлэм.

Вашкала вакытъёсы сямен ик кисьтонэз пусъён ӝытэ мунчо пыро. Ӵукна шыд пӧзьто, пыжисько, берло пыжиськемъёсын чай юыса кулэмъёслы азязы уськыто.

Сям-йылол туала арын ӧжытак воштӥськемын ке но, валанэз ышемын ӧвӧл. Шумпотымон, сӥзьыл но тулыс кисьтонэз егитъёс но пусъё. Озьыен, удмурт сям-йылолъёс азинтӥсько бере, калыкмылэн но вуоноез луоз.