Тон вӧзын ми котьку шудо

Анаймы – улонысьтымы тужгес но дуно зарнимы! Котькуд нуналмы анаймес яратонэн пыӵамын. Улонысьтымы одӥг минутмы но уг ортчы дуно мемимы сярысь малпаськытэк, со сярысь сюлмаськытэк. Со луэмен, ми эркын лобась бурдо выллем. Ми котьку тодӥськом: анаймы котьку юрттоз, шунтоз, кылыныз веськатоз.

Татышлы ёросысь Калмиярын улӥсь мусо но дуно анаймы Зоя Шарифулловна Нуриева туннэ чебер юбилейзэ пусъе. Сюлмысьтымы ӟечкыламмы потэ анаймес вордскем нуналэныз! Та нуналэ солы озьы ик шуныт кылъёссэс вераны дырто кузпалыз, эмеспиосыз но внукъёсыз. Котьку мед луод али сямен ик капчи мылкыдо, задор но чебер. Уз тырмы, дыр, кылъёсмы вань мылкыданъёсмес вераны. Та нуналэ тау карон кылъёсмес тыныд вераськом. Тон луэмен, ми шудо семьяын будӥм, учкымон адямиос луим.

Анай, тон 55 арестэ шудо адямиен пумитаськод, азьпалан но улонэд югыт кизилиен мед пиштоз! Нош ми котьку вӧзад луом, котьку тыныд юрттом!
Ӧд но шӧды, анай, ортчизы та аръёс
Кошкизы, лобизы, вунӥзы нуналъёс
Тон туннэ но чебер, тон туннэ но задор
Луизы ке но улонад я шунды, яке зор.
Будӥзы нылпиосыд, внукъёсыд ни вӧзад
Тэтчало, бергало, чупало бамъёсад
Та ӧвӧл меда шуд, та ӧвӧл-а шудбур?
Вань меда дуннеын талэсь бадӟымез на ваньбур?
Уйёстэ изьытэк, сюлэмдэ жалятэк,
Ми понна тон тыршид ас сярысь малпатэк.
Ӟечлыкмес мед адӟод тон, анай, милесьтым,
Вераськом кылъёсмес ми тыныд сюлмысьтым.
Ми будӥм, ми кошким, оло шер вуиськом,
Но тонэ ми, анай, сюлэмын возиськом.
Ми понна тон котьку шунды сямен пиштод,
Улонмес данъяса сюресмес югдытод.
Тон эн бӧрды, анай, улондэ жаляса,
Эн-эн учкы сьӧрлань, азьлозэ малпаса.
Кӧня вал шудоез та югыт дуннеын,
Нош кӧня луоз на азьпалан улонын.
Сюлмысьтым гажаса ӟеч кылъёс вераськом,
Ваньзэ-ваньзэ ӟечсэ ми тыныд сӥзиськом:
Мед луод тон таза, мед луод тон шудо.
Тон вӧзын ке, ми котьку бурдо.

Яратэ но гажалэ анайёстэс, ноку эн дӥсьтэ соослэсь возьдаськыны, соослы урод кылъёстэс вераны. Анай тӥ понна котьмалэсь дуно мед луоз.Уте анайдэс! Зэмос анай адямилы одӥг пол сётӥське!

                                                                                                 Нылъёсыд.