Губиясь тэле йыромем

Толон Баймак ёросысь Баймурзино гуртысь ньыль эшъёс губияны мынӥллям. Кӧня ке тэльын ветлэмзы бере, соос валаллям, одӥгез эшсы пӧлазы ӧвӧл ни шуыса.

Губиясьёс экстренной службае вазиськиллям. Шумпотымон, спасательёс вуытозь йыромем губиясь ачиз ик нюлэсысь потыны сюрес шедьтэм. Солы эмъюрттэт кулэ луымтэ.

Нюлэскы мыныны дасяськиськом

Нюлэскы мыныку сьӧре басьтоно: пурт, пичияк сиён, шырпу, шулан, телефон (вань ке, портативной зарядник), висисьёслы – эмъюмъёссэс. Дорысьёслы одно ик верано, кыӵе нюлэскы мынэмез но ку бертэмез.

Туала мобильной телефонъёсын gps-навигатор вань. Со адямилэсь кытын луэмзэ возьматэ. Йыромыны шедьыку ориентированиея программаос – «Гугл.Карты» но «Яндекс.Навигатор» - юртто. Нюлэскы яркыт - ӵуж, горд, тӧдьы, нап-ӵуж - дӥськутэн мыныса умой луоз.

Нюлэскысь кызьы потоно?

- Сюресэз ӧз ке но возьматы,GPS-навигатор кытын луэмез тодыны юрттоз.

- Юрттэт возьматонъя службае 112 номеро телефонъя жингыртоно. Со понна коньдон уз басьтэ. Таӵе дыръя шулан но юрттоз. Со пӧйшуръёсты но кышкатоз.

- Нюлэскы пырыку шундылэсь кудпалась пиштэмзэ учконо. Кылсярысь, пырыку со баме пиштэ ке, потыку тыбыре пиштоз. Но вужер шонерак азе уз усьы, со сюреслэсь ӧжытак бур палан луоз.