+19 °С
Салкым
Антитеррор
Вань иворъёс
Общество
16 Куарусён 2023, 10:05

Чакара гурезь йылын концерт радъяськиз

Гужемез лэзем уг поты ке но, шаерамы, чебер буёлъёсын юн-юн вамышъяса, сизьыл вуиз. Куазь но паймымон шулдыр возиське. Инкуазь тазьы ик дораз куное ӧте, кожалод.

Чакара гурезь йылын  концерт радъяськиз
Чакара гурезь йылын концерт радъяськиз

Калтасы ёросысь Бадӟым Качак культура юртысь «Зангари» калык ансамбле пыриськисьёс шулдыр куазен Чакара гурезе шутэтскыны вуизы. Гурт калык инкуазьлы матын улэ ке но, куддыр солэсь чеберзэ но адӟытэк кыле. Угось татын ужъёс уг быро: я гыроно-мерттоно, я октоно-утялтоно. «Ужаса гинэ улонмы медаз ортчы, шутэтскыны но кулэ, - шуо зангариос. – Соин ик туннэ картошка октон ужмес йылпумъяса, Чакара йылэ шутэтскыны тубим. Вашкалаос угось огшоры уг верало вал, гурезь кужым сётэ шуыса. Иське, кызьы верало, одӥг ыбемен кык лудкечез кутом: шутэтском, кужым басьтом.

Кырӟаны но эктыны яратӥсьёс кырӟатэк шутэтскыны уг быгато, нош зангариос воксё быдэс концерт пуктӥзы – турнан вакытэз возматӥзы, Чакара гурезь кылдэм сярысь мадёсэз улонэ пыӵатӥзы. Арган куара котыр инкуазез вырӟытӥз, кожалод, огвакытлы тылобурдоос но лобамысь дугдӥзы. Кин ке паймоз, дыр, учкисьёс но ӧвӧл, нош соос кырӟало но экто шуыса.

«Кин ке понна улоно ӧвӧл, мылкыдыд аспоннад шулдыр мед луоз. Тани кыӵе умой эшъёс пӧлын: серекъяськод но, кайгу-куректондэ но шараяськод», - верало ансамбле пыриськисьёс.

Нош кыӵе ческыт кырын чай но пыжем картошка, дорын сыӵезэ ноку но уд сиы. Турын чайлэн зыныз йырез ик поромытэ, гыр-гыр пыжем картошка весь ньылонэз гочатэ.

Шулдыр но сайкыт Чакараын. Оло пушдунне ик татын шутэтске. Пӧртэм буёлэн шудӥсь писпуос синэз мальдыто, вож кызъёсын кузь кыстӥськись нюлэсъёс гужемез тодэ вайыто. Сальк-сальк омыр бамез веша, писпуос пыр шедем шунды сиос, сӥзьыллы сётскытэк, шунытсэс кузьмало.

 

Чакара гурезь йылын  концерт радъяськиз
Чакара гурезь йылын  концерт радъяськиз
Чакара гурезь йылын  концерт радъяськиз
Чакара гурезь йылын  концерт радъяськиз
Чакара гурезь йылын  концерт радъяськиз
Чакара гурезь йылын  концерт радъяськиз
Чакара гурезь йылын концерт радъяськиз
Автор:Венера Ильбаева
Читайте нас: