Одӥг нуналэ кык адямиез быронлэсь утиз

Пӧсьтолэзе солэн семьяяз кышкыт учыр улэм. Секыт адӟонлэсь соосты Татышлы ёросысь Кызыл-Ярысь Евгений Зайдуллин утем.
30-тӥ пӧсьтолэзе куазь туж пӧсь луиз. Соин Снежана Юрий кузпалыныз но 11 аресъем Анна нылыныз Кам шур дуре шутэтскыны мыныны малпазы. Пыласькыны шлюз вӧзысь водоканалэ дугдӥзы.
- Нылмы вуэ пыриз, - вера Снежана. – Со куспын шлюз вӧзы тягач вуиз. Ми шӧдыса ик ӧм вуттэ, нылмы вуэ выйыны кутскиз. «Мама!» - кылӥськиз солэн куараез. Кузпалыным нылмылы юрттыны бызим.
Та кышкыт суредэз син азяз пуктыса, нылкышнолэн синъёсыз синкылиен тырмо. «Кузпалы нылмы вӧзы туж ӝог вуиз, - азинтэ со веранзэ. - Соку ӧжытлы буйгатски, валай, табере нылмылэн улонэз атаез киын шуыса. Со куспын шӧдӥ: кузпалы ву улэ кошке. Солэн сюлэмыз кутэм».
Та вакытэ шур дурын трос адямиос шутэтскизы, вуын пыласькисьёс но ӧжыт ӧй вал. Озьы ке но соос Анналэсь кесяськемзэ но ӧз кылэ, анай-атаезлэсь со доры быземзэ но ӧз адӟе. Кык тодмотэм пиосмуртъёс гинэ пыд улысьтызы музъемез шӧдытэк ву дуре бызизы.
- Соос пӧлысь одӥгез кузпалылы ӵушкон сётӥз но кыкназэс ик ву дуре кыскыса поттӥз. Яр дуре поттэммы бере кузпалы музъем вылэ усиз: солэн ымдуръёсыз лызэктэмын, мугорыз дырекъя, шокамез секыт. Милемлы нош ик со пиосмуртъёс юрттӥзы – одӥгезлэн сьӧраз нитроглицеринэз вань вылэм. Юрттӥсьёсмы сюрес вылэ вырӟизы. Соку тодам лыктӥз, соослэсь нимъёссэс но ӧй юа шуыса. Туж возьыт луиз. Озьы ке но шумпотӥ, берло ке но пиосмуртъёслэсь машиназэс туспуктыны вутски шуыса.
Снежана Кайсаровалэн сюлэмыз буйгатсконэз ӧз вала. Соку со юрттӥсьёссэ утчаса вотэс баме гожтӥз. Туспуктэмез ик юрттӥз нылзэ но кузпалзэ вуысь поттӥсь пиосмуртэз шедьтыны. Снежаналэсь семьязэ Евгений Зайдуллин быронлэсь утиз. «Со 25 ар ӵоже мувӧй поттӥсьёс дорын ужам. Табере пенсиын шутэтске, - азинтэ веранзэ С. Кайсарова. – Нош вуын выисьёслы юрттыны соосты уж дуразы дышетӥллям». Е. Зайдуллин, Снежаналэн кылъёсызъя, туэ куинь адямиосты быронлэсь утем ни.
Шудо анай но кузпал ӵукна султэмезлы быдэ Евгений Радионовичлы сюлмысь тау каре. Со ке ӧй юрттысал, С. Кайсаровалэн нылыз но кузпалыз син азяз бырысазлы. Нош табере соос арлы быдэ 30-тӥ пӧсьтолэзе кыкетӥ вордскем нуналзэс пусъёзы.