Пӧяськисьлы оскид ке, берпуметӥ коньдондэ но ыштод

Ёросысь прокурорлэн Ф. Ф. Янгуразовлэн ивортэмезъя, таӵе амалэн лушкаськисьёслэн ки улазы шедемъёслэн лыдзы ёросын сокем трос ӧвӧл. Нош кылем арен ӵошатоно ке, лыдпусъёс йыло. Адямиос лушкаськисьёслы сюрс, миллион манетэн коньдонзэс келяло. Таӵе югдур Татышлы ёросэ гинэ ӧвӧл, быдэс республикае паськыт вӧлме.

Полициын ужасьёс но та пумысен мур сюлэмшугъяськемзэс верало. «Ньыль толэзь куспын йыртэмасьёс 11 адямиез пӧязы. Пӧяськисьёслэн ки улазы шедем адями ми доры вазиськиз ке, банкен герӟаськиськом. Соос милемлы валэктон сётытозь, трос дыр ортче. Пӧяськисьёс со куспын коньдонзэс пӧртэм счётъёсы выжтыны яке киязы басьтыны быгато. Соин таӵе амалэн йыртэманлэсь пумзэ шедьтыны секыт. Солэсь утиськон понна котькуд адямилы сак кариськоно, тодмотэм адямиослы осконо ӧвӧл. Калыкез таӵе янгышъёслэсь утён понна банкъёсын но ужаны тыршиськом. Телефон пыр жингыртӥсьёс пӧлын вань кунгож сьӧрын улӥсьёс но. Таӵе амалэн йыртэманы асьме шаерамы улӥсьёс но уг кышкало», - шуо соос.

Прокурор таӵе амалэн йыртэмасьёсты кыл кутытон пумысен чурыт вераськиз. «Пӧяськисьёслэн ки улазы шедем адямиослэсь коньдонзэс шедьтон яке берыктон понна сотовой операторъёсын, банкъёсын ӟечгес ужано. Соос одӥг толэзь яке кык арня куспын тӥледлы валэктон сётӥзы ке, адямиослы нокызьы уд юртты, ваньмызлэн аслаз дырыз, -  шуиз прокурор. – Ужез ӝоггес радъян понна прокуратуралэн но кужмыз вань».

Татышлы ёрос администрациен кивалтӥсь пусйиз, калыкез пӧяськисьёслэсь утён бордын интыысь кивалтэт но тыршыны кулэ. Со понна вань луонлыкъёсты – гуртъёслэсь чатъёссэс, газетъёсты, вотэс бамъёсты – уже кутоно. Адями валаны кулэ: пӧяськисьёслы оскид ке, соослэн ки улысьтызы капчиен уд поты.