Олимпиада нылпиослэсь тодон-валанзэс ӝутыны юрттэ

Олимпиадаын пиналъёслы куинь уж быдэстоно вал. Жюрилэн ёзчиезлэн, Татышлы ёросысь Кальтяево школаысь удмурт кылъя но литературая дышетӥсьлэн Л. А. Хазиповалэн верамезъя, олимпиадалэн нырысетӥ тураз нылпиослы 20 пӧртэм юан сётӥзы. Тазэ ужез тужгес ӟеч быдэстӥзы 10-тӥ классын дышетскисьёс. Соослы ӵектэм юанъёс удмурт кылэн но литератураен, калыклэн культураеныз герӟаськемын вал. Нош кыкетӥ тур нылпиос ог-огенызыудмурт кылын вераськыны быгатэмзэс возьматӥзы. Со диалог амалэн радъяськиз. Куинетӥяз конкурсын тужгес висъяськиз Татышлы ёросысь Выль Татышлы школаысь Екатерина Хатипова. Со «Кристя» веросысь люкетэз учкытэк вераз. 

Олимпиада кык нунал кыстӥськиз. Вормисьёс 13-тӥ толшоре тодмо луизы. Укмысэтӥ классъёс пӧлын нырысетӥ интые потӥз Кальтяево школаысь Ксения Рахматуллина. Нош вормисьёс пӧлын луизы Янаул ёросысь Каймашабаш школаысь Арина Ахметгареева, Татышлы ёросысь Улысь Балтачысь Михаил Кайранов но Янаул ёросысь Вуж Варашысь Есения Фарвазетдинова. Дасэтӥ классъёс пӧлын туэ Выль Артаул школаысь Диана Шараевалы удалтӥз, со – нырысетӥ интыын. Вормисьёс пӧлы шедизы Татышлы ёросысь Улысь Балтачысь Диана Габокова, Бурай ёросысь Выль Тазлар школаысь Азалина Галиханова, Янаул ёросысь Ямады школаысь Элина Куштанаева, Выль Татышлыысь Екатерина Хатипова. Нош 11-тӥ классъёс пӧлын Улысь Балтач школаысь Линда Зидымакова нырысетӥ интые потӥз. Вормисьёс пӧлын луизы Улысь Балтачысь Владимир Рахимзянов, Бурайысь куинетӥ номеро школаысь Валентина Минлебаева но Татышлы ёросысь Выль Татышлыысь Аделина Гайниярова.  

Олимпиадаын вормисьёс но отчы пыриськисьёс Башкортостанысь удмуртъёслэн национально-культурной центрзылэн Таукаронэныз но синпель кузьымъёсын пусъемын. Ужрадэ огазеяськонэн кивалтӥсь Л. Л. Зидымаков пыриськиз.