Малы вунэ анай кыл?

Берло дыре вордскем кылэз дышетон, сое утён сярысь веранъёсты ӵем кылыны луэ. Нылпиослэн анай кылзэс тодымтэзы трос адямиосты сюлмаськытэ.

Алигес вуз карон юртын черодын сылыкум арлыдо кышномуртъёслэсь вераськемзэс кылӥ. Одӥгез песянай внукъёсыз бигер кылын уг верасько шуыса ӝожтӥське. Мукетыз солы шуэ: «Мынам но Екатеринбургын улӥсь пиелэн нылпиосыз ӟуч сямен верасько. Нош бордам улӥсь нунокъёсы бигерзэ но, ӟучсэ но тодо. Мон соосын пичи дырысенызы бигер кылын вераськи. Соос анай-атайзылы ӟучен вазёзы, нош мыным – уз. Монэным одно ик вордскем кылынызы верасько».

Нылпиосты анай кылзылы дышетон, нырысь ик, семья бордысь потэ. Туэ мон вордскем кылэн герӟаськем кык тунсыко учыръёсын пумиськи.

Нылыным Чернушкаысь одӥгаз магазинын ветлыкумы, мыным ӟуч сямен вазись луиз. Учкисько ке, школаын укмыс ар ӵоже ӵош дышетскем эше. Машаен (нимыз воштэмын) ӝыны час пала вераськыса сылӥм. Люкиськеммы бере нылы шуэ: «Вераськонды туж аспӧртэм луиз. Тон удмурт сямен юаськод, со ӟуч кылын вера. Тон малы соин ӟучен ӧд вераськы?»

Удмурт гуртын, удмурт семьяын вордӥськыса будэм, эшъёсыныз пичиысен удмурт сямен вераськем, школаын удмурт кылъя но литературая урокъёсты дышетэм адями кӧня ке ар куспын вордскем кылзэ вунэтоз шат? Оло, кузпалыз удмурт ке ӧй луысал. Удмурт анай-атайёс асьсэ кылынызы вераськонлэсь палонске бере, соослэн нылпиоссы но со кылэз кулэ уз каре.

Кыкетӥез учыр уж дурын луиз. Редакциысь телефонэ нылкышно жингыртӥз, ӟуч сямен вазиз. Анаймес юбилееныз ӟечкылано вал, пе. Удмурт кылын потӥсь газетэ ӟуч кылын ӟечкылан уг сёто, дыр, шуыса, жингыртӥсьлэсь юано кариськи: «Тӥ удмурт сямен вераськиськоды-а?». Со ӟуч сямен ик вера, кӧня ке кылъёсты, пе, тодӥсько шуыса. Соин вераськонмес ӟуч кылын азьланьтӥ. Анаезлэсь кытын улэмзэ, нимтулзэ верамез бере трубкаысь куараез тодмай. Вераськонме удмурт кылын азьланьтӥ. Улысь Балтач гуртын вордскыса будэм Эльза но (нимыз воштэмын) ӟуч кылзэ ӧз потты ни. Вань вунэтэм удмурт кылъёссэ тодаз ваиз, лэся.

Гуртын будыса, городэ интыяськем адямиослэн отын улӥсьёслэсь но ӟучгес луэмзы потэ, вылды. Но тодэм кыл ноку мултэс уг луы. Калыкын юнме уг верало, макем трос кылъёсты тодӥськод, сомында тон визьмогес, кужмогес луиськод шуыса. Адями кужмо, куке анай кылзэ гажа, куке сое мултэс уг кары.