Шаермес утисьёс котьку тодамы мед луозы

Нош шуркынмонэ ортчем ньыль собраниосын соос тужгес сюлмаськытӥсь ужпумъёссэс веразы. Татысь анайёслы, кылсярысь, нылпиоссылы шудыны площадка кулэ. Кенешонэ лыктэмъёс пӧлысь тросэз гуртысьтызы обелискез выльдон сярысь кылпум ӝутӥзы. Проектэ пыриськон пумысен йылпумъясь собрание 7-тӥ толсуре ортчиз. Отчы люкаськем калык огкылысь тужгес лэчыт ужпумез бырйиз. Соос ваньзы «Устройство  обелиска  павшим воинам  в Великой Отечественной войне 1941-1945 гг.» проект понна куаразэс сётӥзы. Солэсь быдэстӥськемзэ чакланы кенешонын нимысьтыз инициативной группа бырйизы.

Программа поддержки местных инициатив проектэ пыриськон понна калыклэсь, спонсоръёслэсь коньдон люкано. Кенешонын проектэ бюджетысь шыръям коньдонэз но кутыны быгатозы шуыса вераськизы. Выль уж борды калмияръёс ӟеч мылкыдын кутско. Уго Быдӟым Атыкай ожын быремъёсты буре вайыса пуктэм обелиск аръёс ӵоже аслэсьтыз кулэлыксэ уз ышты. Со нылпиосты вордскем шаеренызы, асьсэлэн выжыосынызы данъяськыны дышетоз. Кенешон бере культура юртын радъяськем концерт но калыклэсь выль ужлы мылкыдзэ ӝутӥз.      

Татьяна Шарафутдинова,

инициативной группалэн ёзчиез.