Клубын тупатъян ужъёс лэсьтэмын

- Туэ «Реальные дела» проектлы огъя 245.5 млн коньдон висъяське. Со пӧлысь 224,9 миллионэз – республика бюджетысь, 18,4 миллионэз – интыысь бюджетъёсысь, 2,2 миллионэз – внебюджетной коньдон. Таяз арын проект улсын 703 ужрадъёс, ужъёс быдэстыны чакламын, - вера БР-ысь Кун Собранилэн – Курултайлэн депутатэз Рузалия Хисматуллина.

Янаул ёросысь Сандугач гурт поселение пырись гуртъёсын улӥсьёс но та проектлы дурбасьто. «Милям ужамы бадӟым юрттэт луо «Реальные дела», «Программа поддержки местных инициатив» проектъёс. Кылем арын, кылсярысь, «Реальные дела» проектъя Норканысь шайез 140 сюрс манет тыр кенерамы. Туэ та проектъя Барабановкаысь клубын тупатон ужъёс лэсьтэмын», - вера Сандугач гурт поселенилэн администрациеныз кивалтӥсь Тимерзян Куснияров.

Барабановка гуртын улӥсьёс чебер, югыт клуб сярысь кемалась малпаськыса улӥзы. Табере соослэн малпанзы быдэсмиз. «Гурт калык клубъёсы, культура юртъёсы пӧртэм ужрадъёсы люкаське. Татын нылпиос но егитъёс, ужасьёс но арлыдоос шутэтско, концертъёс учко, - вера «Единая Россия» партилэн Янаул ёросысь исполнительной секретарез Гульнар Зиязова. – Барабановка клублэсь выжъёссэ, вӧлдэтъёссэ выльдӥзы. Стенаоссэ штукатуркаен тупатыса буязы. Сцена тупатӥзы, ӧсъёссэ воштӥзы».

Клубен кивалтӥсь Надежда Кусниярова вконтакте вотэсбамаз гожтэ: «Клубамы тупатон ужъёс йылпумъяськизы. Бадӟым тау ваньдылы, кин та ужез быдэстыны юрттӥз: «Единая Россия» партилэн Янаул ёросысь ёзэтэзлы, Янаул ёросысь культурая управленилы, Сандугач гурт поселенилэн администрациезлы, «Мичуринский» ООО-лы но ужез быдэстӥсь организациослы».

Фото: Барабановский СК