Туннэ - Нылпи садын ужасьёслэн нуналзы

Янаул ёросысь Максим гуртысь нылпи сад кылем арысен, 24-тӥ куарусёнысен, гуртысь школа бордын ужа. Пичиос школалэн бурд улаз кариськемзы дырысен нылпи садэн кивалтон школалэн директорезлы Лэйсен Армагиновалы выжиз.    

- Кылем арын нылпи садэ дас пичиос ветлӥзы, туэ – тямыс. Соосын воспитатель Маргарита Хузина но воспитательлэн юрттӥсез Лиана Шарафиева ужало. Пичиосты ческыт сиёнэн утялтэ пӧзьтӥськись Зилия Галиакберова, - вера Лэйсен Рифовна. – Нылпи садэ тупатон ужъёс лэсьтыны «Реальные дела» программа юрттӥз. Укноосты со поргаммая выльдӥм.    

Маргарита Рифовна пичильтыкъёслэн дуннеязы ужаны 19 ар талэсь азьвыл кутскем. Со котькуд пиналлэн сюлмаз усьтон шедьтыны быгатэ.   

- Азьло аръёсты али дырен ӵошатоно ке, садике лыктӥсь нылпиослэн лыдзы арысь аре кулэсме. Ужаны кутскыкум нылпиос трос вал, 36 нылпиен но ужамы. Соку нылпи садамы кык группа вал, - вера. М. Хузина. – Трос нылпиосын ужаны капчигес вал. Али одӥг группае пӧртэм аресъемъёс ветло. . Кылсярысь, тужгес пичиезлы - одӥг арес но дас толэзь. Бадӟымъёсын занятиос ке ортчытъяно, со дыре ик пичиослы но саклык висъяно   

Вуоно арын нылпи садысь ньылез пиналъёс нырысетӥ классэ мынозы. Нош соос интые мукетъёсыз вуозы-а? Вераны шуг, малы ке шуоно Максим гуртысь тросэз егит семьяос палэнэ улыны интыясько. Вераны кулэ, берло аръёсы школаын дышетскисьёслэн но лыдзы трослы кулэсмем. Кылсярысь, туэ отын 23 пиналъёс тодон-валан басьто.    

- Гуртамы бигеръёс но, удмуртъёс но уло. Соин пичиосын пӧртэм кылын вераськоно луиськом, - ватса дас куать арлэсь кема нылпи садын ужась Лиана Шарафиева.         

Маргарита Рифовна но Лиана Ильсуровна удмурт, бигер, ӟуч кылъёсы огкадь ӟеч тодо. Соин котькуд пиналэн капчиен огкыл шедьто. Соос нылпиосты лякытэн, небыт кылъёсын визьнодало. Ӵемысь пичильтыкъёсын пӧртэм ужрадъёсы, конкурсъёсы но пырисько.         

- Арлы быдэ «Мы - гагаринцы» олимпиадае пыриськиськом, ГТО-лэсь нормативъёссэ сётъяськом, - вера Маргарита Рифовна. – «Осенний бал», «Мамин праздник», «Новый год» но мукет праздникъёс ортчытъяськом. Нылпиослы экскурсиосы потаны но кельше. Гуртмылэн урамъёстӥз ветлӥськом, ӵыпет дуре васькиськом.  Чылкыт омырен шокан тазалыклы пайда вае.  

Нылпи садын ужасьёс пӧртэм шудонъёс, ужрадъёс пыр пичиосты инкуазез яратыны, утьыны, вордскем шаерзэс гажаны дышето.   

Туспуктэмез Алексей Самирзяновлэн.