+23 °С
Салкым
Антитеррор
Вань иворъёс
Общество
2 августэ , 16:38

«Усточикар» дас нунал ӵоже муш палэп выллем гужлалоз

Башкортостанын 2003-тӥ арысен удмурт нылпиос понна «Усточикар» лагерь ужа.Аръёс ӵоже отын республикаысьтымы пиналъёс сяна, Удмурт Элькунысь, Пермь шаерысь пиналъёс шутэтскизы.Татышлы ёрос администрацилэн юрттэменыз, лагерь туэ но ӧссъёссэ усьтӥз, сизьымдонлэсь трос нылпиосты шумпоттӥз.

«Усточикар» дас нунал ӵоже муш палэп выллем гужлалоз
«Усточикар» дас нунал ӵоже муш палэп выллем гужлалоз

Башкортостанысь но Пермь шаерысь пиналъёс татчы нырысетӥ августэ люкаськизы. Нош лагерез усьтонлы сӥзем ужрад туннэ, кыкетӥ августэ, ортчиз.  Нылпиосты та шудо нуналъёсын ӟечкылазы «Усточикар» лагерен кивалтӥсь А. Г. Зайноков, Татышлы ёрос администрациен кивалтӥсьлэн социальной ужпумъёсъя воштӥсез А. У. Шайнурова, Татышлы ёрос администрациысь егитъёслэн политикая ёзэтэнызы кивалтӥсь Э. Д. Валиева, Башкортостанысь удмуртъёслэн национально-культурной центренызы кивалтӥсь Л. Л. Зидымаков. Соос пиналъёслы трос выль тодон-валан басьтыны, шумпотыса шутэтскыны сӥзизы. «Данъяське анай кылыныды, культураеныды, - шуиз Альфия Ураловна. – Тӥляд со сокем узыр».

«Усточикар» лагерьын удмурт калыклэсь культуразэ, сям-йылолъёссэ утён бордын ужалозы «Фольклор» ӧръя ӧнерчи И. В. Бехтерева, «Эстрада» ӧръя – С. А. Зянкулова, «Театр» ӧръя  - Д. В. Корепанов. Нош «Киуж» ӧръя ӧнерчи Т. О. Монжерина нылпиосты фоамиранлэсь чебересь сяськаос лэсьтыны дышетоз. Одӥгез ужзы италмас, пе, луоз.

Нылпиослэсь шутэтскон дырзэс тунсыко ортчытон сярысь вожатойёс Н. В. Соприн, Н. Е. Пронев, С. Г. Турова но М. Ф. Нуриахметова тыршозы. Егитъёслэн ужзы борды мыло-кыдо кутскемзы нырысетӥ нуналъёсы ик яркыт шӧдӥськиз. Соин татысь «Куака куара», «Зарни куара», «Сьӧд сюровал» отрядъёсысь пиналъёслы ноку мӧзмыт уз луы. Соос ваньзы ӵошен шутэтскозы, кырӟалозы но эктозы. «Усточикар» лагерьын дас нунал ӵоже пӧртэм шулдыр кырӟан гуръёс чузъяськозы. Со сярысь сюлмаськоз усто кырӟась но арганчи Ю. Ф. Нуриахметов. Лагерьын тазалыкез кыдатон сярысь но уз вунэтэ. «Зарядка но лэсьтомы, тупен но шудомы», - вера лагерен кивалтӥсь. Огкылын вераса, «Усточикар» дас нунал ӵоже муш палэп выллем гужлалоз.   

Автор:Оля Нигаматуллина
Читайте нас в