Пичи дырысь эшез - арган

Та вормонэ Анастасия Валиева но трос кужымзэ понӥз. Уго со куа­мын арлэсь кема пӧртэм ужрадъёсы, шулдыръясь­конъёсы мыло-кыдо пырись­кылӥз. Арлыдыз шоры учкытэк, Анастасия Галихановна сэзь, чырткем луэменыз, коты­рысьтыз адямиосызлы шу­ныт мылкыд кузьмаменыз висъяськылӥз. «Шулдыр кырӟа, куараез чебер, ачиз арганэн шудэ вал, - ӟеч кылъёсын ва­зиське ансамблен азьвыл кивалтӥсь Гузалия Губаева. - Анастасия апайлэн апай-сузэръёсызлэн но куараоссы жингырес. Со­ослэсь семейной ансамбль кылдытыса ёрос ужрадъёсы но пыриськылӥм».

Арганэн шудонэн Аниса апай (милемыз озьы вазиськы­ны куриз, гуртазы но озьы, пе, вазисько) пичи дырысеныз ик тунсыкъяськем. Лапас сигын шудыса пукисько, пе, вал. Уго та крезьгуро инструментэн атаез, Галихан агай, эшъясь­кем. Кырӟаны но со усто вы­лэм. Атаезлэн быгатонлыкъ­ёсыз нылызлы но выжем, дыр. Галихан агаен Мадифа апай сизьым нылпи будэтӥллям. Атайзэ оже келякузы Аниса апайлы одӥг арня сяна вы­лымтэ на. Та вакытэ тросэз нылпиос выллем, солы но нуныяськыса бу­дыны кылдымтэ. «Дышетскыны Ямадые пыдын ветлом вал. Пы­дын - кут. Соин пыд кынмыса ӵемысь висьыны усьылӥ. Сизьым классэз йыл­пумъяме бере, ужаны кутски. Вербовщикъёс сьӧры Украи­нае ужаны кош­ки. Отын ньыль ар чугун сюрес вылын тырши. Аслым дӥськут басьтӥ. Со вакытэ отын асьме палъёс трос ужазы», - уло­нысьтыз секыт вакытъёссэ тодаз вайыса вера со. Арган но аслаз тыршыса поттэм коньдонэныз басьтӥз. Туннэ нуналэ Аниса апай яратоно эшеныз уг люкиськы. Шулдыр гурзэ но кырӟанзэ котькинлы сюлмысьтыз кузьма. Со сяна, крезьгур дуннее «выем» кыш­номурт радио пыр чузъяськем кырӟанъёсты но кылзыны яратэ. Сюлэмезлы матын лу­исьёссэ крезьгурезъя кылъ­ёссэ тупатэ. Озьы выль но чебер кырӟанъёс шыкысаз люкасько. Соосты Аниса апай юрт котыраз бергакуз кырӟа. Пересьмон нуналъёссэ Аниса апай Толя пиезлэн семьяе­ныз ӵош пумита.

Туспуктэм редакцилэн архивысьтыз басьтэмын. 2016-тӥ ар.