+14 °С
Салкым
Антитеррор
Вань иворъёс
Общество
26 куартолэзе , 11:16

Витьтон сизьым ар ӵошен уло ни

Хализа Исламовна но Гарифулла Гарифанович Гарифановъёс ог-огзылы матысь гуртъёсын - Улысь Балтачын но Дубовкаын - вордӥськизы. Школаын дышетскыкузы егитъёс люконтэм эшъёс луизы. Нош быдэ вуыса, 1965-тӥарын, кузпалъяськизы.

Витьтон сизьым ар ӵошен уло ни
Витьтон сизьым ар ӵошен уло ни

Гарифулла Гарифанович семья кылдытыкуз анай-ата­ез мӧйыесь ни вал. Ӝоген соос огзы бере огзы улонэн люкиськизы. Егит кузпалъ­ёслы улон биньгозызэс асьсэ киосазы басьтоно луэм. Соос улонзэс вордӥськем палъёсы­нызы ик герӟаны малпаллям.

- Гурт хозяйствоын ком­байнэн, пӧртэм тракторъёсын тырши. Со сяна, кык ар токарь­лы дышетски. Дышетсконэ таин гинэ ӧз йылпумъяськы, 1975-тӥ арын очно амалэн Белебейысь сельхозтехни­куме тодон-валан люканы пыри, - вера Гарифулла агай. – Дышетсконме йылпумъяме бере, нырысь монэ бригадирлы юрттӥсе юнматӥзы, нош со­бере комплексной бригадире пуктӥзы.

Калыкен кивалтыны, егитъёсын кусып шедьтыны быгатэмез понна ик, луоз, Гарифулла Гарифановичлы шутэтскыны потон азяз Улысь Балтач гурт поселенилэн ад­министрациеныз кивалтыны оскизы. Та удысаз тыршыкуз, солэн трос дырыз уж дураз ортчылӥз. Нош юрт котырысь­тыз ужзэ быдэсъян кузпалыз вылэ усьылӥз.

Хализа Исламовна пӧртэм удысъёсын тыршиз. Солы скал кыскисьлэсь, гурт хо­зяйствоысь пӧртэм ужъёсты быдэсъясьлэсь, утялскись­лэсь ужъёссэ веръяно луиз. «Дубовка школаез нылпиос­лэн лыктоназы пу вандылыса, пильылыса шунтӥськом вал. Уйин 2-3 часын школае мы­ныса, гурзэ эстылӥм, - маде Хализа апай. - Кызь кык ар татын улыса, 1987-тӥ арын Улысь Балтач гуртэ улыны выжим. Татчы лыктэм бере пекарняын тырши. Нянь пыжи».

Шутэтскыны потон азяз Хализа Исламовна пересьёс­лэн юртазы тыршиз. Татысь песянайёслы мисьтӥськыны, утялскыны юрттылӥз. Лякыт сямо, ваньмыныз вераськы­ны одӥг кыл шедьтӥсь кыш­номуртэз ваньзы яратӥзы. «Пенсие потыкум песянайёс­мы бӧрдыса кылизы», - вера Хализа апай.

Гарифанов кузпалъёс вить нылпи будэтӥзы. Ваньзы ик соос школаын ӟеч дышет­скизы. Улонын асьсэлы пар шедьтыса синмаськымон се­мьяос кылдытӥзы. Бадӟымез Владислав пизы атаезлэн вордӥськем юртаз ик выжы лэзиз, выль юрт пуктӥз. Улысь Балтач школаын покчи клас­съёсты дышетӥсьын тыршись Нина кузпалыныз куинь пи­налъёссэс пыд йылазы сул­тыто. Эдуард пизы семьяены­зы Свердловск улосвылысь Первоуральск городын улэ но новотрубной заводын тырше. Эдуард аслэсьтыз улонзэ Эвелинаен герӟаз. Соослэн кык нылъёссы будо. Равиль, Светлана но Алексей ныл­пиоссэс Пермь шаерысь Чер­нушка город бордаз кыскиз. «Равилен Света кыксы ик дышетӥсьлы тодон-валан басьтӥзы ке но, али огзы но та удысын уг тыршо, - вера Гарифулла агай. – Равиль ужбергатӥсь дорын экспеди­торын тырше, Света – нылпи садын. Пичиез Алексей пимы чугун сюрес вылын ужа».

- Вить нылпи, вить пӧртэм сюлмаськонъёс. Кыкнады но ужын, секыт ӧй вал-а нылпи­остэс будэтыны? – юасько кузпалъёслэсь.

- Нылпиосмес секыт ӧм будэтэ , ӧз висьылэ соос. Бадӟымъёсыз пичиоссэ утизы. Дӥськут азьвыл чидась вал, - вера Хализа апай. – Табере асьсэос милемлы юртто. Гу­жем дэмен люкаськыса турын шулдыр дасяськом.

Быдэс гумырзэс ужаса ортчытэм кузпалъёс, шутэтскыны потыса но ужтэк пукыны сюлэмзы уг чида. Коть­куд нунал гидкуасьтызы пудо­оссы соослэсь доразы потэмзэс витё. Нош садын мушъёслэн гужлам куаразы кылӥське.

Автор:Марина Николаева
Читайте нас в