«Илиш музъеме выжы лэзи»

Удмуртиысь Сарапул ёросысь Тарасово гуртын вордӥськыса будэм Рита Миннетдинова вуоно кузпалыныз эшезлэн сюаназ тодматскем. Кема дыр ортчымтэ, Олег Шамсигалиевич егит нылэз вордскем гуртаз кузпаллы ваем. Рита Ивановнаен вераськыса уд но вала, со Илиш ёросысь Ташкичи гуртэ палэнысь лыктэм шуыса. «Илиш музъеме выжы лэзи. Нош ташкичиос дышетӥзы асьсэ сямен вераськыны», - серекъяса шуэ 23 арлэсь ятыр башкир музъемын улӥсь кышномурт.

Рита Ивановна 14 арлэсь кема ини вуз карисьын ужа. Гуртоосыз со сярысь ӟеч кылъёсын вазисько. Котькуд басьяськисез со пальпотӥсь ымнырын, пе, пумита. «Ташкичие бызем бере свинокомплексын ужай. Декретной отпуск бере магазинэ ужаны потӥ. Со дырысен та ужам тыршисько ни», - вера вуз карись. Олег Шамсигалиевич  гуртысьтызы хохяйствоязы электрогазосварщикын тырше. Миннетдинов кузпалъёслэн куинь пиоссы-кивоштӥсьёссы.

Рита Ивановнаез гуртазы ортчись ужрадъёсысь но ӵем, пе, пумиталод. «Со милемлы котьку юрттӥське. «Пинал сюлэмъёс» ансамблямы кырӟа, мукет ужрадъёсы но пыриське», - вера гуртысь клубен кивалтӥсь Гульнара Сафиева. Ӵапак ми Ташкичие вуылон вакытэ Рита Ивановналы Анайлэн нуналэзлы сӥзем ужрадэз нуыны оскемын вал. «Егитъёс гуртысь кошко бере, пиналъёс ӧжыт. Азьло клубамы ортчись ужрадъёсты пиналъёс шулдырто вал. Клубын ужасьёс вазисько бере, маин быгатӥсько, юрттыны тыршисько, - вера Рита Ивановна. - Гуртын ортчись концертъёсы пыриськыны луэ, нош палэнын ортчись уужрадъёсы котьку уд мыны. Магазинэз ӵогаса уд кошкы ук. Гуртамы вуз карон юрт одӥг гинэ».

Фотоез Алексей Самирзяновлэн.