+14 °С
Салкым
Антитеррор
Вань иворъёс
Общество
23 куартолэзе , 21:02

Нылпиослэсь ӟечсэ адӟон – бадӟым шуд

Витьтон куинь ар талэсь азьло Пермь шаерысь Куеда ёросысь Гожан гуртын выль се­мья вордӥськем. Сое вить ар эшъяськем егитъёс Анфиза Зиевна но Владимир Садрисламович кылдытӥллям.

Нылпиослэсь ӟечсэ адӟон – бадӟым шуд
Нылпиослэсь ӟечсэ адӟон – бадӟым шуд

Анфиза но Владимир кузпалъёслэн улонзы гурт удысэн герӟаськемын. Ан­физа апай тямысэтӥ клас­сэ йылпумъямез бере ик фермае вамыштэм. Отын быдэс уж сюрессэ тыршем. Вань сюлэм шунытсэ, ку­жымзэ сётыса ужам. Тыр­шемез ӟеч емышъёс сётэм. Со азьветлӥсьёслэн радазы луэм. Анфиза апай скал кы­сконын но, кунян утёнын но висъяськем. Кунянъёсыз та­заесь но чебересь будӥллям. «Дас тямыс скалэз киын кы­скомы вал. Ужаны тыршимы. Табере киос висё ни», - ужан аръёссэ тодаз вайыса вера Анфиза апай.

Пинал дыръяз со сокем чырткем луэм. Фермаын ужан вакытаз ик, шутэт­скыкузы, Анфиза Зиевна киужъёсын вырыны дыр шедьтылэм. Керттӥськыны, пужыятӥськыны, вуриськы­ны – али но со ваньмызлы усточи. Со сяна, Анфиза апай чебересь кылбуръёс  «пӧра» на. Соос «Ошмес» но «Ӟечбур!» газетъёсын дун­неез адӟизы. Яратоно ужъё­сызлэсь кышномурт али но уг люкиськы. «Картлы кошкыку ӝӧккышет, миндэр пуйыос но мукетсэ пужыятыса ачим да­сялляй», - вера Анфиза апай.

- Пинал дыръяз со туж чебер вал. Али но чебер, - ве­раськонамы пыриське Влади­мир кузпалыз. Соин ик, дыр, Анфиза апаез мукетъёс выль кенлы лушкалозы шуыса, Владимир Садрисламович армиысь шутэтскыны бер­тыкуз аслыз кузпал вайыса кельтэм. Владимир агайлэн анаез но Анфиза апаез туж яратэм. Пиезлы выль ке­нак вайыса кельтыны сюл­маськем. Армиысь бертыса, Владимир Садрисламович уж сюрессэ гуртысьтызы колхозазы азинтэм. Берлось аръёссэ нефтяникъёс дорын ужам. Нош туннэ кузпалъёс асьсэ но нылпиоссы понна тыршо. Гужем мушъёссы ко­тырын бергало, чипы-курегъ­ёс, ӟазегъёс, ош-кунянъёс утё. Озьы ке но Анфиза Зиев­на культура юртысь «Пинал сюлэм» ансамбльлэн ужаз но пыриськыны вутӥське. Отысь нылкышноосын ӵош соос пӧртэм ужрадъёсы вуылӥллям ни.

Арлыдо кузпалъёслы юрт котыразы юрттӥськыны нылпиоссы ӵемысь бертыло. Анфиза Зиевналэн но Влади­мир Садрисламовичлэн соос асьсэос кадь удалтэмесь, кибашлыесь. Римма, Ирина, Геннадий, Юрий но Катя тодон-валан басьтыса, коть­кудзы асьсэ понназы уло, нылпи будэто. Нош будэтэм нылпиосыдлэсь ӟечсэ адӟон – со ачиз бадӟым шуд.

Автор:Марина Николаева
Читайте нас в