Ӟеч ужъёс даур ӵоже быдэстӥсько

Арлы быдэ 19-тӥ куартолэзе Россиын Пионерилэн нуналэз пусйиське. Туэ пионеръёслэн огазеяськонзылэн кылдэмез дырысен 100 ар тырме.

Пионеръёслэн радазы пырон азьло улонлэн одӥгез валтӥсь люкетэныз лыдъяськиз. Пионерьёс пӧртэм ужрадъёсы, парадъёсы мыло-кыдо пыриськылӥзы, субботникъёсы потазы, гурт хозяйствоослы юрттылӥзы, макулатура люказы но мукет. Пионеръёслэн огазеяськонъёссы бордын спортивной, художественной, научной но творческой кружокъёс ужазы.

Пионеръёслэсь ужзэс азинтӥсьёс туннэ но вань. Кылсярысь, Башкортостанын «Пионеры Башкортостана» огазеяськон кылдытэмын. Со 1990-тӥ арысь куарусёнысен ужа. Школаысь пионеръёс арлыдоослы юрттӥськыны ветло, акциосы, пӧртэм ужрадъёсы, форумъёсы пырисько.

Пионерилэн дауръем лыдпусэзлы сӥзем ужрадъёс школаосын, дышетон юртъёсын трос радъясько. Кылсярысь, та нуналъёсы Крымын «Детское движение России: вчера, сегодня, завтра» калыккуспо научно-практической конференция ортчиз. Отчы республикаысьтымы пионеръёс но вуылӥзы. Нош Пермь шаерысь Куеда ёросысь Бадӟым Гондыр школаын пионеръёслэн огазеяськонзылэн 100 ар тырмонэзлы сӥзем «Семья года-2022» конкурс ялэмын вал. Со Бадӟым Гондырысь школаын но солэн Кипчакысь но Киргаысь филиалъёсаз радъяськиз. Конкурсэ школаын дышетскисьёс семьяосынызы пыриськизы. Вормисьёсты пӧртэм номинациосъя бырйизы. «Пионерская песня» номинациын вормисе потӥзы Фламингъёслэн но Гаптиевъёслэн семьяоссы, «Стихи о пионерах» номинациын висъяськизы Петрофановъёс но Чужековъёс, нош «Театрализованное представление о пионерах» номинациын – Шарибзяновъёс. «Стенгазета» номинациын вормисе потӥзы Разяповъёс. Кипчакысь Зартиновъёслэн семьязы «Арлэн семьяез» нимлы кузё луиз.

Фото: Алексей Самирзянов.