Пудоос котырын - 44 ар

Валерий Гиндуллинич Бадӟым Качак гуртын вордӥськиз. Пичиысен ик гурт уж борды басьтӥськиз. Куатетӥ классын дышетскыкуз  солы валэн беризь куар ворттыны оскизы, пе. Нош 1969-тӥ арын школазэ йылпумъямез бере, палэнысь шуд утчаса ӧз ветлы, аслаз вордӥськем музъемаз ик выжы лэзиз. Ужаны со гуртысьтызы фермае интыяськиз. Со дырысен Валерий Гиндуллинич, нокытчы кожылытэк, ньыльдон ньыль ар ӵоже пудо утиз.Та вакытэ троссэ ужъёсты киын быдэсъяно ке но луиз, пичиысен ужлэсь шӧмзэ веръяса будэм пияш ваньзэ чидаз, вормиз, капчизэ ӧз утча. «Пудо куайытонын ужай, кунян но ути. Транспортёръёс соку ӧй вал. Кыедэз ваньзэ киын поттӥмы, - ужан аръёссэ тодаз вайыса вера Валерий агай. – Фермаын ужасьёс азе чурыт куронъёс пуктӥськизы. Калык контроль ужаз».

Валерий Гиндуллиничлэсь кема аръёс ӵоже ужзэ яратыса, йылаз-пумаз вуттыса тыршемзэ уно данъян грамотаосыз, медальёсыз возьмато. Соос пӧлын «За трудовое отличие» медаль но «Орден Трудовой Славы III степени», «Знак Почёта» орденъёс висъясько. Сыӵе наградаосты огшоры гинэ уг сёто. Со понна уй но нунал удысад трос кужымдэ, визьдэ пононо, котькуд килограмм привес понна трос сюлмаськоно. «Уждунэз коньдонэн ӧз сётэ. Соин дорын пудо вордыса коньдон поттӥм, - вераськонамы пыриське Рита кузпалыз. – Та вакытэ секыт ке но йӧтӥз, шумпотонэз но ӧжыт ӧй вал. Колхозмы ужасьёссэ пӧртэм городъёсы цирке, концертэ нуллӥз».

Пудоос котырын берганы яратӥсь Валерий агай кузпалзэ но уж дурысьтыз ик шедьтӥз. Кургак гуртысь Рита апай та вакытэ татысь фермаын скал кыскисьын тыршиз. Озьы соос ӵошен одӥг улон ӧретӥ вамыштӥзы. Кузпалъёслэн ужзы но пӧртэм ӧз луы: дас классэ йылпумъяса фермае вамыштэм Рита апай но куамын сизьым ар ӵоже скал кыскисьын ужаз. Ӵукнаысен ӝытозь соос уждурын ке но луизы, кык муспотон нылъёссэс таза но визьмо будэтон сярысь сюлмаськизы. Лина но Елена табере асьсэлэн семьяосынызы уло ни. Озьы ке но соос сюлэм шунытсэс сётыса будэтэм анай-атайзэс уг вунэто, юрттӥськыны ӵем вуыло. Нош юрттӥськытэк уг луы. Уго Иванов кузпалъёслэн шутэтскыны потыса но ужтэк улыны сюлэмзы уг чида. Али но соослэсь гидкуазэс пудо но тылобурдо куараос шулдырто. 

Туспуктэм редакцилэн архивысьтыз басьтэмын.