Выль Татышлыысь Елена но Юрий Нуриахметовъёслэн семьязы дас кык ар талэсь азьвыл кылдӥз. Туннэ соослэсь улонзэс Ксения но Андрей нылпиоссы шулдырто.
Выль Татышлыысь но Уразгильдыысь егитъёс школаын дышетскыкузы ик эшъяськиллям. Бӧрысь пӧртэм интыосын тодон-валан люкаллям ке но, кусыпсэс ыштӥллямтэ. Эшъяськонзы 2010-тӥ арын сюанэн йылпумъяськем. Кузпалъёс Еленалэн вордскем гуртаз – Выль Татышлые – интыяськиллям. «Нырысь времянкаын улӥмы, нош кык ар талэсь азьло выль коркамы выжимы, - вера Елена. - Юртмес ӝутыны кун программаен пайдаяськимы, анаймурт капиталэз ужамы кутӥмы».
Экономистлы дышетскем Елена 2014-тӥ арысен гуртысьтызы модельной библиотекаен кивалтэ. Лыдӟиськисьёсын ужамез сяна, со уж дураз нылпиосын пӧртэм ужрадъёс, конкурсъёс радъя, кудъёсаз пиналъёс шумпотыса пырисько. Библиотекаен кивалтӥсез ассэ но ужрадъёсысь ӵем пумитаны луэ. Со спортэн эшъяське – волейболъя но ӝӧквыл теннисъя ӵошатсконъёсын – кужымзэ эскере.
Кузпалъёс «Шулдыр ӝыт» калык ансамбльын кырӟало-экто. Юра «Удмурт пиос» ансамбльлэн кырӟасез но луэ. Со пӧртэм крезьгуро инструментъёсын усто шудэ. Татын солы Воткинскысь П. И. Чайковский нимо педагогикая колледжын басьтэм тодон-валанэз юрттэ, луоз. Отын дышетскыкуз Юра колледж бордысь «Сайкан» ансамбле но ветлэм. Юра пичи дырысеныз крезьгур дуннее кыстӥськем. «Ми Сергеен (авт. – Юра но Сергей кыктоос) нылпи садэ ветлыкумы ик кырӟаськомы вал. Милям кыкнамылэн но шудон гармошкаосмы вань вал. Соин шудылӥм. Школае ветлыкумы но кырӟанэн ӧм люкиське. Тодам на, кызьы куатетӥ-сизьыметӥ классъёсын дышетскыкумы Сергеен Выль Татышлыысь культура юртэ баянэн шудыны дышетскыны ветлӥмы. Уразгильды – Выль Татышлы сюресэз гужем велосипедэн ортчылӥмы, нош толалтэ - пыдын яке куасэн», - вера Юра.
- Юраен Сергей крезен но усто шудо, - вера Елена. - Кылем арын мон но крезен шудыны дышетски.
Али Юра Выль Татышлыысь многофункциональной клубен кивалтэ. Нуриахметовъёслэсь семьязэс – крезьгуро семья шуыны луоз. Соос ваньзы крезьгур дуннеын уло. Ньылетӥ классэз йылпумъясь Ксения нылзы Вылысь Татышлыысь хореографияя «Виктория» образцовой ансабле ветлэ, Выль Татышлыысь «Пушъетъёс» удмурт фольклор нылпи ансамбльын но эктэ. Со сяна, нылаш оригамиен, алмазной мозаикаен вырыны яратэ. Нырысетӥ классын дышетскись Андрейлы но сцена вылэ потано луэ.
Нуриахметовъёс шутэтскон нуналъёссэс но тунсыко радъяны сюлмасько. Анайлэсь, атайлэсь, семьялэсь нуналъёссэс, Нылпиосты утён нуналэз ӵошен орчытъяны тыршо. Со сяна, Нуриахметовъёс семьяенызы толалтэ гурезе тюбинген нискыланы, катоке конькиен ветлыны потало. Ёрос центрысь бассейнэ, кинотеатре но ӵем вуыло.
- Семья – со бадӟым шумпотон. Шумпотӥськом милям нылпиосмы вань шуыса. Соос туж тыршись, милемын ӵош котькуд ужрадэ пыриськыны дась, - верало кузпалъёс.
Нуриахметов кузпалъёсты республика ужрадъёсысь но ӵем адӟыны луэ. Соос Башкортостанысь удмуртъёслэн национально-культурной центрзылэн, историяя но культурая центрлэн ужъёсазы мыло-кыдо пырисько.