Янаул ёросысь Барабановка гуртысь Лилия но Геннадий Гафиуллинъёслэн семья кылдытэмзылы туэ 37 ар луэ. Соос шумпотонъёссэс но шуг-секытъёссэс ӵошен люко. Кузпалъёс уж дуразы но - парсь вордон комплексэ - котькуд нунал ӵошен вамышъяллям. Лилия Бадрисламовна берлось кык арзэ шутэтске ни, нош Геннадий Зарифьянович ужа на. Со 1981-тӥ арысен татын электриклэсь ужзэ быдэсъя.
- Свинокомплекс гуртмылэсь ог кык иськем палэнэ интыяськемын. Уж дурамы азьло пыдын ветлӥмы. Троссэ ужъёсты киын быдэсъямы. Ведра-карнанэн, флягаен сиён нуллӥмы, улзэс сузямы. Парсьпиосты куд-ог дыръя бутылкаосын но сюдылӥськом вал. Арняяз огпол гинэ шутэтскылӥм. Озьы ке но уж дурамы котьку шумпотыса мынӥськом но шумпотыса ужаськом вал. Али уж трослы капчиямын, - вера 38 ар парсь утён удысын тыршем Лилия Бадрисламовна.
Гафиуллинъёслэн анай-атайзылэн пытьыетӥзы вамыштӥзы Юрий пизы но Алёна кензы. Соос но парсь вордон комплексын тыршо. Юра 2008-тӥ арысен ни дробильной цехын тырше, нош Алёна кузпалыз - пӧзьтӥськисьын. Али со пичи нунызэс будэтэ. Егит семья анай-атаенызы ӵош улэ. Соослэн Егор пизы но Ксения нылзы будо. «Нылпиосын огкылысь улӥськомы. Вакытаз милям но гуртысь кошкеммы ӧз поты. Кузпалылэн анкай-аткаеныз 25 ар ӵош улӥмы. Соос Юра пимес но Юлия нылмес утьыны юрттӥзы. Юлия семьяеныз али Максим гуртын улэ», - вера Лилия апай.
Гафиуллинъёс 2005-тӥ арын выль корка улыны выжизы. Ӝутӥськон ужъёс капчиен ӧз ке но сётске, кузпалъёс огъя кужымен ваньзэ вормизы. Вань ужъёссэс ӵошен быдэсъязы, пудо но трос вордӥзы, нылпиоссылы но тодон-валан сётыны тыршизы.
Гафиуллинъёслэн быдэстэм ужъёссы адӟем карымон луиз. Лилия Бадрисламовна Башкортостан Республикаысь Гурт хозяйствоя министерстволэн Данъян грамотаеныз пусъемын, нош Геннадий Зарифьянович но Юрий Геннадьевич - Янаул ёрос администрацилэн Тау карон гожтэтэныз.