Аслаз кужымезлы оскыса

Янаул ёросысь Наняды гуртысь Фёдор Тимирзянов но няньлэсь шӧмзэ пичи дырысеныз тодыса будӥз. Та вакытэ ик солэн вордӥськем шаерезлэн паськытэсь бусыосызлы, солэн узырлыкезлы синмаськонэз юнмаз. Со сяна, гурт удысын тыршись атаез но, Сабирзян агай, уж дураз юрттӥсь пиезлы музъемез дунъяны, валаны юрттӥз. Солэсь адӟем карыса Федя агай но вордӥськем музъемезлэсь палэнэ кошкыны ӧз дырты. Школазэ йылпумъяса, хозяйствое вамыштӥз. Отын пӧртэм ужъёсты быдэсъяз. Удысаз одӥг ар гинэ ужаса вуттӥз, армие басьтӥзы. «Дуннеез адӟиськиз. Дальний Востокын, Сахалинын, служить кари. Берло отчы кыльыны но куро вал, кыдёке уяны поталомы шуыса», - вера Фёдор Сабирзянович. Но бертон дырыз вуэм бере, сое нокыӵе чебересь кылъёсын пӧяны быгатӥллямтэ ни. Егит пилэн сюлэмыз дор палъёсаз куриськем.

Фёдор Сабирзяновичлы кыдёке уяны кылдымтэ ке но, вордӥськем шаерезлэн паськытэсь бусыосаз со комбайнэн ньыль ар ӵоже «уяз». Та вакытэ ик со ужзэ вис карытэк Сигаевоысь техникуме агрономлы дышетскыны пыриз. Нош 1992-тӥ арын Фёдор Сабирзяновичез «Восток» хозяйствое валтӥсь агрономе юнматӥзы. Со дырысен бусы ужъёс Ф. Тимирзянов вылын возисько. «Кыӵе культураосты, кызьы кизьыны асьмеос бырйиськом. Инкуазьлы мон ноку уг оскиськы. Аслым гинэ оскисько. Асьмелэсь кужыммес лыдэ басьтыса тыршиськом. Ужан техникаосмы милям умоесь. Кык МТЗ-82, Т-150 тракторъёс басьтӥм, - вера Фёдор Сабирзянович. – Кизьыны ю тысь музъемлы учкыса бырйиськом. Асьмелэсь кидысъёсмес кельтӥськом, вошъяськом, арлы быдэ ӟеч выжыысьсэ басьтон сярысь сюлмаськиськом».

Музъем ужасьлы тулыс но сӥзьыл тужгес ӟырдыт йӧтэ. Та вакыт изьыса улэмез уг витьы. Ваньзэ дыраз быдэстоно. «Тулыс но сӥзьыл, уж пӧзён вакытэ, телефон куинь минут но тэк уг улы, - серекъяса вера Федя агай. – Сиськыны пуксьыса вуыны уг луы, телефон жингыртыны кутске. Кинлы ке запчасть вуттоно, кинлы ке вӧй кулэ. Озьы ӵукна кошкисько но, дорысь ужъёсты вунэтӥсько».

Фёдор Сабирзянович оскымон, визьмо, мыло-кыдо ужась. Со сяна, со культура удысын ортчоно ужрадъёсы пыриське, общественной ужъёсты но быдэсъя. Гурт удысын ужась сярысь верам ӟеч кылъёсты ёрос, республика данъян грамотаосыз но юнмато, кудъёсыз Фёдор Сабирзяновичлэн уно люкаськемын. 

Матысьгес тодматскыса, Федя агайлэсь мукет тунсыкъяськонзэ но тодӥмы. Со книгаос лыдӟыны яратэ. Тужгес, пе, остросюжетной детективъёс кельшо. Соосты толалтэ томен-томен лыдӟылэ. Нош йыртӥянъёсты мульыез сямен куада.

Туспуктэм вылын: Фёдор Тимирзянов (паллянысен ньылетӥез) «Восток» хозяйствоын ужасьёсын ӵош.

Туспуктэм редакцилэн архивысьтыз басьтэмын.