"Ужатэк сюлэм уг чида"

Калтасы ёросысь Бадӟым Туганеевоын вордӥськем кузпалъёслэн улонзы гуртэнызы но татысь гурт хозяйствоен герӟаськиз. Наритдин Шарипович кема аръёс ӵоже парсь вордон фермаен кивалтӥз. Зоя Галимзяновна но татын ик тыршиз. 1970-тӥ аръёсы парсьёслэн лыдзы 3000-лы матэ вылэм, пе. Татын пӧртэм семинаръёс радъяськиллям.

- Семинар дыръя парсь вордон фермаез чебер буяло вал. Милемлы, Тюльди школае ветлӥсь пиналъёслы, со аспӧртэм пичи город выллем  адӟиське вал, - тодаз вайыса вера гуртысьтызы «Марӟан» ансамбле ветлӥсь  Тамара Галяутдинова.  

Зоя апайлэн ужан аръёсыз парсь вордон фермаын ортчизы. Пичиысен кыдаса будэм кышномурт шуг-секытъёслы сётӥськытэк, удыссэ синмаськымон нуиз. «Куинь-ньыль толэзь ӵоже толэзяз 60-70 парсьпи басьтылӥм», - вера со. Зоя Галимзяновналэсь усто тыршемзэ кивалтэт но синйылтытэк ӧз кельты: 1984-тӥ арын «Москвич-412» капчи машинаен данъязы. Со сяна, тазалыксэ йӧнатыны Сочие путёвка сётӥзы на. Солэн медальёсыз но Данъян грамотаосыз лыдъяса быдтонтэм.

- Азьвыл фермаын тыршем сяна, колхозын алма, кушман ужаны сёто вал. Нырысь колхозлэсь октылӥм. Асьме бакчае потӥськом ке, улляса пыртылозы вал. Троссэ дорысь ужъёсты уйин быдэсъяллямы. Гуртэ тыл  1962-тӥ арын гинэ пыртӥзы,- вера Зоя апай. – Али улон айбат. Ву, газ корка пыремын. Мае сием потэ, сое сииськом. Пенсимес но вакытаз вайыса сёто».

Зоя Галимзяновна вить нылъёслэн но кык пиослэн анайзы луэ. Нылпиосыз паръяськыса пӧртэм интыосы улыны интыяськизы ке но, анайзэс уг вунэто. Арнялы быдэ сямен бертыло. Бакча мерттыны, юртъер котырысь ужъёсты быдэсъяны юртто, пе.

1975-тӥ арын «Анаймурт дан» орденэн данъям кышномурт ужтэк пуконэз син азяз но пуктыны уг быгаты. Со керттӥське, пыжиське. Зоя апайлэн синъёсты бордазы кыскись пӧртэм тусо шортъёсын быдэстэм киужъёсыз трос. «Мар карод, ужтэк пукыны уг валаськы. Тазэ внучкаелы шуыса керттӥ, выждэраме нылъёсылы сётӥсько, - ужъёссэ возьматыса вера кибашлы анаймурт. – Нылпиосмы пичи дыръя мон черсӥсько вал, Наритдин пӧлэстэ, керттыны но юрттылӥз».

Зоя апайлэн пыжиськемъёсыз но удалто. Ми вуылон нуналэ со газ плитаяз нянь пыже вал. Милемыз но ческыт пыжем няненыз, чаен кунояз. Аресэз шоры учкытэк, Зоя апай чырткем берга на юртъер котыраз. «Ужатэк сюлэм уг чида», - шуэ со.