Кенешыса, ог-огзылы тыбыр пыкет луыса уло

«Балтач ёросэ 1985-тӥ арын вуи, башкир кылъя урокъёсты нуись дышетӥсь луыса. 1986-тӥ арын Асавка школаын ужаны кутски», - вера Гульсира Рамазановна. Со дырысен егит дышетӥсьлэн улонэз Асавка гуртэн люкиськонтэм герӟаськем. Татысь Рашит Николаевичен соос семья кылдытӥллям.

Удмурт семьяын башкир нылэз туж шуныт пумиталлям. «Кузпалыным но, солэн матысьёсыныз но мыным удалтӥз. Рашитлэн семьяяз вуыса, мон аслам дорам шеди, кожай. Кузпалылэн анаез но атаез монэ асьсэлэн нылзы интыын адӟизы. Соос ноку но мыным секыт кыл ӧз вералэ. Соослэн шуныт бурд улазы улонын ваньмызлы дыши. Соослы бадӟым тау шуисько», - вера Г. Миннигалиева.

- Вордӥськем палъёстылэсь мӧзмем дыръёсты луизы, дыр, - юасько Гульсира Рамазановналэсь.

- Зэмзэ ке верано, али сыӵе дыры сярысь тодэ вайыны ик уг быгатӥськы ни. Школаын, пиналъёсын валлин, мӧзмыны дыр уг шедьы вал. Нуналлэсь ортчемзэ ик шӧдытэк кылиськом вал. Кӧня ужрадъёс дасяллямы, ортчытъямы. Ӵош ужам дышетӥсьёсын туж тупаса, огкылысь кариськыса ужамы. Коллегаосы матысь эшъёсы луизы. Вордскем палъёсы бертэм потӥз ке но, азьло луонлыкъёс али кадь ӧй вал. Нуналаз Баймаке мыныса вуысалэд шат? - юанэлы валэктон сётыса шуэ Г. Р. Миннигалиева.

Гульсира Рамазановна Асавка школаын куамын арлэсь трос ужам. Башкир кылъя урокъёсты нуон сяна, пиналъёслы «Культура Башкортостана», «История Башкортостана» предметъёсъя тодон-валан сётэм. Солэсь ужзэ трос пол Балтач ёросысь дышетонъя ёзэтлэн Данъян грамотаосыныз, Тау карон гожтэтъёсын пусйылӥллям.

Рашит Николаевич гурт хозяйствоын водительын тыршем. Али школаын ужа, дышетскон юртэз дыраз шунтон сярысь сюлмаське.

Гульсира но Ришат Миннигалиевъёслэн кык пиоссы. Рафильлэн но Рафаэльлэн - асьсэлэн семьяоссы. Соос вордскем гуртазы, матысьёссы доры ӵем бертыло. Песяй-песятайзы доры внукъёссы но шумпотыса вуо. 

- Пиосмы кыксы ик эмъюрттэт удысэз бырйизы, - вера Гульсира Рамазановна. – Рафиль Бирскысь медколлеждын дышетскиз. Али рентгенолаборант луыса ужа. Рафаэль Пермьысь фармакадемиез йылпумъяз, провизорын тырше. Пиосмы семьяосынызы Уфае улыны интыяськизы.

Миннигалиев кузпалъёс сярысь гуртооссы шуныт кылъёсын гинэ вазисько. Соосты гуртазы ортчись ужрадъёсысь но пумитаны луэ, огъя быдэстоно ужъёслэсь но палэнэ, пе, уг кылё.

- Куамын вить арлы матэ ни милям семьяямы ог-огдэ гажан, валан, яратон кузёясько. Котькыӵе ужез ӵошен быдэсъяны тыршиськом. Арлыдо анай-атайёсмылы юрттӥськиськом. Кенешыса, ог-огедлы тыбыр пыкет луыса улон – со бадӟым шуд, - вераськонмес йылпумъяса шуиз Гульсира Рамазановна.