Математикаез ӟеч тодэм ужбергатонын юрттэ

Ансия Тимершановна нырысь вуз каронэн гинэ выре вылэм. Гуртын трос пенсионеръёс уло, нош магазинэ ваем няньзы ваньзылы уг тырмы, куддыръя няньтэк но кылё вылэм. Озьы кыкетӥ ужез – пекарняын пыжиськон – 2008-тӥ арысен туннэ нуналозь сое сюдэ, нош гуртооссэ ческыт пыжиськемъёсын но полуфабрикатъёсын шумпоттэ.

Ансия пичи дырысеныз ужез валаса будэм, семьязы бадӟым вылэм уго – 12 адями. «Дас одӥг арескысен нянь ачим ныркисько ни. Песяе валэктылӥз: «Вылысьтыд ву виятозь ныркы». Нянь пыжыны со дышетӥз», - тодаз вае кышномурт. Нош дышетскемезъя со – математик. Школаын но та предметэз гажам. Лыдъяськыны-чотаськыны яратӥсь нылаш кема аръёс ӵоже вузкарисьын ужам анаезлэн пытьыетӥз вамыштыны турттэ вылэм. Нош вузкаронлэсь вань шӧгзэ-кузьытсэ веръям анаез чутрак пумит луэм. Озьы Ансия БГУ-э математикая факультетэ пыре, но семьяез кылдэмен, Стерлитамакысь физико-математической факультетэз йылпумъя. Соос кузпалыныз нырысь Стерлитамакын уло, собере уйпала кошко.

Дас арскын Ансия нылыныз вордскем гуртаз, Канлые, бертоно кариське. 2001-тӥ арын со пичи дырысь малпанзэ быдэстэм, аслэсьтыз магазинзэ усьтэм. Кышномуртлы дышетӥсь луыса одӥг нунал но ужаны ӧз кылды ке но, математикаез ӟеч тодэмез ужаз ваньзэ лыдъяса-чотаса возьыны, бизнес-планъёс лэсьтыны юрттэ. Дас арзэ пайдаё ужаса, Ансия Тимершановна магазин вӧзаз пекарня усьтӥз на. Магазин озьы ик ужа, отын табере Ансиялэн Люция сузэрез тырше. Бордаз одӥг вузкарисез вань на.

Ансия Тимершановна вӧл-вӧл но югыт пекарняяз ужа. Бордаз - пыжиськисьёс, чыры-пыры ужъёсты быдэсъясь, водительёс. Соос ваньзы Канлы гуртын уло. Нянь сяна, татысь гуръёсысь  пирогъёс, булкаос, сметанник, учпочмакъёс, курник но мукет ческыт пыжиськемъёс пото. Узы-боры вакыт, емышъёс вуыку, соосты ужасьёс ик бичало но кынтыса кельто. Татын куронъёсъя но ужало: юбилейёсы, вордскем нуналъёсы нимаз пирогъёс пыжыса дасяло.

Канлыын пыжем нянез, пыжиськемъёсты мукет интыосын но ярато. Татысь нянез куинь ар ёросысь школаосы басьтылӥллям, Кушнаренковое но нулло. Али Ансия Тимершановналэн малпаназ – ёрос центразы асьсэлэсь магазинзэс усьтыны. Вань ужъёсаз солы Ринат кузпалыз юрттӥське. Вуззэс пӧртэм интыосы нуллон но со вылын. 

Ужбергатонэн вырыны быгатон, кужым, чидан кулэ, дыр. А. Кельмухаметова ӵукнаысен ӝытозь  уждураз берга ке но, жадёнлы, секытлыкъёслы сётскыны уг тыршы.