-2 °С
Салкым
Антитеррор
Вань иворъёс
Общество
4 куартолэзе 2022, 15:00

Ваньмон дырзэ киужъёсызлы сӥзе

Янаул ёросысь Шудек гуртысь Насима Гайнанова пинал дырысеныз киужъёсын тунсыкъяськем. Каймашабашын будэм нылаш соку нырос-пӧзьыос керттон бордын тросгес тыршем. Со дырысен керттӥськон Насима Владимировналэн яратоно ужез луэм.

Ваньмон дырзэ киужъёсызлы сӥзе
Ваньмон дырзэ киужъёсызлы сӥзе

Насима Гайнанова улон сюрессэ ӝутӥськонэн герӟам. Казахстанэ мыныса, соку гинэ усьтӥськем ӝутӥськон материалъёсъя комбинатын тямыс ар кранэн ужам. «Башенной кранэн ужай, кранъёсын ик вагонъёсты но бушатъям. Бӧрысь ӝутӥськонъя мастерлэсь ужъёссэ быдэсъяй. Аркадий пие но мынам сюрестӥм ик вамыштӥз. Со но ӝутӥськонъя мастерын тырше. Казахстанын огъя 16 ар улӥ. Вордӥськем палъёсам бертыса но ӝутӥськон удысын ик тырши. Со вакытэ ик капчи машина нуллыны но дышетски. Кызь кык ар ӵоже руль сьӧрын ветлӥсько ни», – вера Насима Владимировна. Секыт ужын тыршыса но Н. Гайнанова яратоно уженыз люкиськылымтэ. Со керттӥськыны котьку дыр шедьтэм. Уж дураз но керттӥськисько, пе, вал. «Нылпиос будыкузы керттэм дӥськутъёсын ветлӥзы. Со сяна, заказъёс но басьтылӥ. Али киужъёсын толалтэ тросгес вырисько. Гужем дыры кырын ортче», - вера Насима Владимировна.

Кибашлы кышномуртлэн спицаосын быдэстэм ужъёсыз туж чебересь пӧрмо. Кофтаос, шапкаос, беретъёс, шарфъёс, майкаос, креслоос вылэ накидкаос – ваньзы бордазы кыско. «Дорам бадӟым мунёе вань. Солы но дӥськут ачим керттӥ», - вера Насима Владимировна. Со сяна, Н. Гайнанова гуртысьтызы библиотека бордысь «Оптимист» клублэн ужаз но мыло-кыдо пыриське. Татын со выль киужъёслы дышетске, быгатонлыкъёсыныз эшъёсыныз люкиське. Со сяна, Насима Гайнанова «Опимист» клубе ветлӥсь нылкышноосын куасэн ветлыны поталона.

- Час-часэн куасэн ветлӥськом. Куас сюрес но тупатӥм. Мон пинал дыръя но куасэн бызьылыны яратӥсько вал. Одӥг ӵошатсконэз но ӧй кельтылы. Али куасэн ветлыку, со ваньмыз тодэ лыктэ, син азе пуксе, - вера Насима Владимировна. – Куасэн ветлон мыным кужым сётэ, задор мылкыд кузьма.    

Автор:Марина Николаева
Читайте нас: