Огпол веръялод – кышкыт вотэсэ шедёд

Сыӵе кышкытэсь иворъёсты тодыса улыса но, малы «кайф» сьӧры уиськисьёс уг быро меда? Наркотик вӧлмытӥсьёслэн «вотэсъёсазы» ялан кин ке но шеде. Кылсярысь, Россия Федерациысь генпрокуратуралэн сайтаз пырыса иворъёсты эскерид ке, котькуд нунал ватсам иворъёс пӧлысь одно ик шедьтод наркотикен герӟаськем йыртэмасьёс сярысь гожтэмез.

Россиысь генпрокуратуралэн статистикаезъя, наркоманилэн сюресаз ӵем выжо нылпи юртъёсысь потэмъёс: выпускникъёс пӧлысь тросэз алкоголиклы, наркоманлы, бомжлы пӧрмо, йыртэмало но асьсэ киосынызы улонэн люкисько. Соос пӧлысь 10 процентэз гинэ улонын интызэс шедьто. Таӵе югдурен нюръяськонлы шаермы бадӟым саклык висъя. Пӧртэм ужрадъёс ортчыло, проектъёс ужало. Соослэн валтӥсь ужпумзы – анай-атайтэм нылпиослы бадӟым улонэ вамыш лэсьтыны юрттон, азьланяз асьсэлы уж быръён.

Наркомания – со быдэс шаерлэн висёнэз. Нылпиосты наркоманиен, юонэн герӟаськем сюресъёслэсь утён – ӵошен быдэстоно ужпум.

Фото: открытый источник.