Мылкыдзы ялан егит

Женя агай армиысь бертэм бераз кузпалъяськем. Нырысь соос  Сарапулын улӥллям. Насима апай отысь швейной фабрикаын ужам. Но егит кузпалъёс городын улонэз гуртлы воштоно кариськиллям. Анай-атай юртазы бертыса, соосын тямыс ар ӵош улӥллям. Собере  колхоз квартирае улыны потӥллям. Нош али Гизитдиновъёс асьсэ кужыменызы ӝутэм сандык кадь корказы уло.

Насима Мухаматяровналэн ужан сюресэз татысь парсь фермаен герӟаськемын, нош пенсие потэм школаысен. Пичи нылъёсты но пиосты со ческыт сиёнэн сюдэм, начальной школаязы утялтӥськись но вылэм.

Евгений Шаяхметович  Янаул ёросысь «Заря» колхозын водительын тыршем. Со  ГАЗ-51, ЗИЛ, ГАЗ-53, КамАЗ но мукет машинаосыныз Россилэн пӧртэм интыосаз вуылэм: уж сюресэз Башкортостанлэн палэназ, Свердловск, Москва сьӧры но вуттэм . Куро прессовать карыса, Казахстанэтӥ но котыръяськем.

Гизитдиновъёс куинь нылпи вордӥзы. Ваньзы асьсэ семьяосынызы уло ни. Нылзы - Ижевскын, акушерка луыса ужа. Пиоссы Янаул вӧзысь «Истяк» микрорайонэ корка вутӥзы. Анай-атайзы юрттӥськемен, ӝутӥськон ужзы трослы капчиен пӧрмем. «Нылпиос понна улӥськом. Соос пичи дыръя куинь скал но утимы. Кунянъёссэс вузаськом вал, парсь но тросэн вордӥм », - шуо кузпалъёс.

Коньдон поттон вылысь,  Женя агай муш но утьыны кутскем. «Аткай мушъёс котырын берга вал. Со  90-тӥ аръёсын вал ай. Колхозын уждун ӧвӧл. Кык палэп ваи. Со бордысен ик мушъёс йылыны кутскизы»,  - тодаз вае Евгений Шаяхматович.  Муш  - со сыӵе маке: шумпоттэ, табыш пыртэ, куректон но вайыны быгатэ. Гизитдиновъёслэн но куамын пала муш йырзы бырон дыръёссы  луэм. Но яратоно ужзылэсь соос палэнскиллямтэ. Та семьяын али но тросэн муш утё.

Евгений Шаяхметовичлэн мукетыз тунсыкъяськонэз – чорыган. Гуртысьтызы чорыганы яратӥсьёсын кытчы гинэ со уг вуы! Сыӵе дыръёсы пудо утён Насима апай вылэ усе ке но, кышномурт парзэ пӧсь сиён дасяса, чидатэк возьма. Насима апайлэн но тунсыкъяськонэз вань: со кырӟаны яратэ, гуртысьтызы  кышномуртъёсын ӵош «Етӥн» фольклор ансамбле ветлэ.

Куатьтон ареслэсь бадӟым Гизитдиновъёс чырткемесь ай. Улон пыр потэм, гуртын улонлэсь вань шӧгзэ-кузьытсэ веръям, семья куспын тупаса улонлэсь секретсэ тодӥсь кузпалъёс  дорзэс, гуртсэс, куноосты пумитаны ярато, нылпиоссылэсь но внукъёссылэсь бертэмзэс шумпотыса возьмало.