Ӵужайлэн шыкысысьтыз узырлыкъёс

Куэм дэрем. Азькышет

Шакир ӵужатае ожысь 1945-тӥ арын сентябрь толэзе бертэм. Дорысьёсызлы кузьымъёс ваем — басма вандэтъёс (отрезки), мешок выллем кык украин нылкышно юбкаос: одӥгез горд, кыкетӥез лыз тусо, векчиесь тӧдьы чуро. Нылпиосызлы — улмоос.

Гуртазы одӥг гинэ «Зингер» вуриськон машина вылэм — Менкия пичапайзылэн. Фазила ӵужапае со басма вандэтъёслэсь азькышет вурем. Нош сӧзулзэ чеберъяны лентаос кулэ луэм. Анайзылэн дэрем сӧзулыз кык чуро лентаен вуремын вылэм. Озьы тӥни азьпал лента вӧзтӥ сэрттыса, азькышетэз чеберъям. Нош ӵужанай дэремзэ дӥсяллякуз, со интыез азькышетэз шобыртӥз. Юбкаосты миндэр пуйылы пӧрмытиллям. Салам улмоос ческыт ик вылӥллям: анае кык улмозэ чуланысьтыз пичи ларе ӟег пӧлы ватыса кельтэм.

Куэм ӵушкон

Вашкалаослэн улоназы ӵушкон нимысьтыз инты басьтэм. Бадӟымез ӵужмуртэ выль кен ваем Вылысь Балтач гуртысь Надия нимо нылэз. Сюанлэсь азьло кельышон нерге ортчытозы вылэм. Ӵушконэз ӵужкенакелэн анай-атаез кудозылы – ӵужатаелы кузьмаллям.

Йыркышет

1954-тӥ арын анае сизьым классэз быдтэм. Со арын ветылзэс Мензада апаенызы «Подольской» вуриськон машинаен воштӥллям. Вуриськон ласянь каньыл луэм. Ачиз но, агайёсыз но вуриськыны туж ӝог дышиллям. Анай басма вандэтъёслэсь аслыз йыркышет вурем. Сое  тугъёсын чеберъям.

Пужыятэм азькышет

Ӵужапае тӧдьы басма вандэтъёслэсь парен азькышет вурем. Борддоразы журнал бамысь сяська тугокоен суред возиське вылэм. Мукет бамаз Н.С. Хрущевлэн портретэз. Со суред туж чебер потоз вылэм. Ӵапак со сяська тугокоез адӟемкарыса азькышетъёслы пужы пуктӥзы. Поръёс кус керттон но мар вузало вылэм. Пужъятскыны сое сэртӥллям. Мулине сӥньыс но вузаськылэм ни.

 Бешмет

Бешметэз вурем Бигиней гуртын улӥсь Александра Юминская, сое Саня апай шуо вал. Со переське ке но вал ни, туж усто вуриськылӥз.

Шортдэрем

Та шортдэремез вурем Татышлы ёросысь Альга гуртын улӥсь Мулланур Гайнияров.

Куэм дэремъёс

Магазинъёсын хлопок сӥньысъёс тросгес потыны кутскем бере, етӥн шортэн куиськонъёс кулэсмизы. Но сӥньысъёсты шедьтыны шуг на вал. Дэра куон понна нимысьтыз кись кулэ луэм. Гуртазы Сайдафа бадӟанайзылэн сыӵе кисез вань вылэм. Муртлы сётъямез потымтэ, ӝог вуштӥське шуыса. Берло мукетъёс сое ӟучъёслэсь басьтылӥзы. Пужыятыса дэра куонэз туж секыт уж вылэм. Сӥньысъёссэ, буелъёссэ котыр ёросысь утчано. Мыныны-бертыны техника ӧвӧл. Сюрес вылэ потыны бер ӝытэ но кылёзы вылэм. Пужы кылдытыны но дышоно вал. Куиськонэн тужгес толалтэ выриллям. Ӝытъёсы дэра пумазы лампа ошозы вылэм.

Азьло дырысен нылъёс чебер дӥсяськыны яратӥзы. Дэремъёссэс, азькышетъёссэс бадӟымесь геометрической пужыосын чеберъязы. Ужазы пӧртэм тусо сӥньысъёсты кутӥзы: гордзэ, ӵужзэ, лыззэ но мукетъёссэ.

Гужем сабантуе выль дэралэсь дэрем вуриськылоз ни вылэм. Солэсь сӧзулъёссэ лентаен, асьсэ киосынызы керттэм чильтэръёсын чеберъяллям. Анае азьмынисьёслэн слётазы ветлэм. Янаулэ вуытэк паллян пала чебер кыр интые люкаллям соосыз. Туж шулдыр бигер крезьгур чузъяськем. Анай слётысь дас метр чильтэр, пе, вайыса бертӥ. Кык дэремъёссэ соин чеберъям.

Дэремъёссэс пужыосъя нималлям: кизиё-гердо, сарафинка, кечато, буё, фабрик.

 Сабантуй бере дэремзэс шудонъёсы дӥсяллям. Эшъёсызлэн ваньзылэн куэм дэремъёссы вылымтэ. Соос анайлэсь дэремзэя огпол ке но дӥсяны курылиллям. "Сётӥсько вал", - шуэ анай.

Анае пинал дыр дӥськутсэ али ке но уте. Котькудӥз бордын солэн тусбуез.

Камзол

Камзоллэн кузёез ӵужаелэн анаез вылэм. Нош со бере камзол ӵужапай кие кылем. Камзол кузь вылэм. Сое вакчиятыса, выль укоос вурыса нуллэм. 

Ӝӧккышет

 Та ӝӧккышетэз Фазила ӵужапае куэм. Анайлэн сюаназ сое ӝок вылэ вӧлдэм. Али но со нерге ӧз быры на сюан дыръя.

Гожтэт

Та гожтэт 1942-тӥ арын сизьыметӥ январьын гожтэмын. Ӵужанаелэсь ӵужатайлы верано кылъёссэ кагаз вылэ   Татышлы ёросысь Утар-Елга гуртысь Кабибян Ахмаев гожтэм. Но кыӵе ке муген гожтэт келяськытэк кылем. 

"Вот Шакр посулкадэс басьтӥм ваньзэ мар понӥд сое. Пудоос вань али поттыны ке быгатӥм, апайёсын валче ворттӥськом куро. Тӥ отын тэльмыриськоды ми татын. Бертэмдэс адӟомы на а меда. Шакр туэ потом али толэз..." - гожтэмын гожтэтын.  

Та гожтэтэз гожтэмзы бере ӵуказез Зидияр ӵужмурт вордскем. 

Сазь улон

Гуртмы « Трезвое село» республика конкурсэ пыриське бере, анаелы, Василя Шакировна Мухаяровалы,  кӧня ке юанъёсын вазиськи.

 Азьвыл егитъёс юылӥзы-а?

Соку юисьёс туж шер пумисько вал. Толалтэ но гужем Бигиней гуртысь клубе шудонъёсы ветлӥмы. Зидияр выныным трос дыръя арганэн шудылӥм. Егитъёс оген но, ӵошен но эктылӥзы. Толалтэ асьмеос ик клубез шунтӥмы.  Гужем сабантуйёсын но шудомы вал арганэн. Кытысь юод? Сиыны нянь но ӧз тырмылы. Быдэ вуэм нылъёс-пиос бадӟымъёс бордынгес ужазы: гыризы-кизизы, турын дасязы. Толалтэ дӥськут дасязы. Пиос тросгес кут куталозы вал. Солэн но ужез дэралэн кадь ик туж секыт. Беризь нинь дасязы.

 Нош юисьёс ку адскыны кутскизы?

Магазинъёсын азьло но аракы, мукет пӧртэм курыт юонъёс вузазы. Басьтыны дуно вал. Аракылэн дуныз йырам на – 3-20 манет. Колхозъёс юнмазы, калык нянь басьтыны быгатӥз…

 Мар верасалыд сазь улон сярысь?

 Улон юонтэк но шулдыр. Медаз юэ вал, нокинэ трос юытэм уг пот.Таза луоно, тросгес ужано. 

Калыкын юнме уг шуо: «Юэм адями – со ӝыны адями». 

Дасяз Лира ЗИЯДУЛЛИНА.

Татышлы ёросысь Улысь Балтач гурт.