Котькуд киужезлы сюлэм шунытсэ сётэ

Синъёсты бордазы кыскись ужъёс Лилия Идиятовналэн усто киосыныз быдэстэмын. Шӧдӥське, соосты со котькудзэ сюлэм шунытсэ сётыса лэсьтэм.
- Киужен 6-7-тӥ классъёсын дышетскыку вырыны кутски. Нырысь ныросъёс керттылӥ. Семьяямы ми ньыль ныл но ньыль пи будӥмы. Анаймылэн керттӥськыны дырыз ӧй вал. Со комбайнер луыса но, пилорамаын но ужалляз. Апайёсы киужен выро ни вал. Соослэсь мон но керттӥськыны, пужыятскыны дышетски, - вера Лилия апай.
Л. Галякбарова быгатонлыкъёссэ арысь аре азинтыны тыршем. Озьы солэн пужыятэм миндэр пуйыосыз, ӝӧккышетъёсыз, ковёрез но мукет ужъёсыз пӧрмиллям. Али со мочалкаос, тапочкиос керттон бордын тросгес тырше. Алмазной мозаика но люкасько на, пе. Лилия апай внучкаоссэ но шумпоттыны тырше. Соослы панамкаос, мунёоссылы дӥськутъёс керттылэ.
Галякбаровъёслэн Руслан пизы но пичи дыръяз пужыятсконэн тунсыкъяськем. Анайзэ со керттӥськыны но дышетыны куре вылэм. Со сяна, Руслан суредаське на. Солэсь борддоръёсы ошылэм суредъёссэ синйылтытэк кельтыны уг луы. Озьы ке но Руслан аслыз сварщиклэсь удыссэ быръем. «Киыз ваньмызлы мынэ», - вера анаез со сярысь.
Лилия апай гуртысьтызы «Марӟан» ансамбльын кырӟа-эктэ. Со гуртазы, ёросазы ортчылӥсь тросаз ужрадъёсы пыриське. «Лилия Идиятовна - ӟеч сямо, куноясь адями, - вера гуртысь клубен кивалтӥсь Ольга Диязова. - Со укно дураз но сад-бакчаяз пӧртэм сяськаос будэтэ. Пӧрам-пыжиськемъёсыз но солэн удалто».

Туспуктэмез Алексей САМИРЗЯНОВЛЭН.