"Асьмеос мед луомы сыӵе ик пӧртэмесь, со дыре ик сыӵе матынэсь ог-огмылы"

Татьяна Ишматова вераз: «Мон котьку шумпотыса вуисько башкир музъемын улӥсь удмуртъёс доры. Шумпотӥсько, туннэ та бадӟым ужрадэ вуи шуыса. Улонамы секытлыкъёс кылдэмын вал. Оскисько, асьмеос соосты вормимы. Секытлыкъёс эшъёслэсь, ог-огенымы пумиськыса вераськонъёслэсь, эшлыко кусыпъёслэсь дунлыксэс валаны юрттӥзы. Туннэ асьмеос - ӵошен. Калык культурамес, сям-йылолъёсмес, анай кылмес утён но азинтон понна, котькудмы валаны кулэ, калыкмылэн вуоноез асьме киын шуыса. Туннэ элькунмылэн кивалтэтэзлэн нимыныз тау кылъёсме вераме потэ Башкортостанлэн кивалтэтэзлы. Татын улӥсь удмуртъёслы пӧртэм ласянь юрттэт возьматӥське. Со котьма ласянь шӧдӥське. Удмуртъёслэн национально-культурной центренызы радъям ужрадъёсы пӧртэм ведомствоосысь, министерствоосысь куноос пырисько. Шумпотоно, удмурт азьветлӥсьёс бадӟымесь наградаослы кузё луо. Гажано эшъёс, туннэ йыбырттыса тау кареме потэ Башкириын улӥсь удмуртъёслэсь культуразэс утемдылы, удмуртлыкез ӝутэмдылы, удмурт калыклэн асваланэз, асшӧдонэз мед ӝутскоз шуыса тыршемдылы. Асьмелэн сюлэмъёсмы висё удмурт калыклэн азьпал улонэз сярысь. Соин сӥземе потэ: ваче ки кариськыса ужаны мед быгатомы. Мед луомы сыӵе ик пӧртэмесь, но со дыре ик сыӵе матынэсь ог-огмылы. Тау карисько съездэ лыктэмдылы, тыршемдылы. Туж оскисько, эшъёсты но, вӧзады будӥсь пиналъёсты но ноку уз палэнске удмурт калыклэсь, анай кылзылэсь».

Татьяна Витальевна НКЦ-лэн нырысетӥ кивалтӥсез Ренат Галямшинэз но тодаз ваиз. Со сярысь трос шуныт кылъёс вераз. Съездын Ренат Биктимировичез одӥг минут шып сылыса буре ваизы. Та нуналэ солэн шайгу вылаз сяськаос понӥзы.

Фото: https://vk.com/id7338404?z=photo7338404_457248210%2Fwall7338404_14412