Башкортостанысь удмуртъёслэн VI съездзы ортчиз

Туннэ, 2-тӥ апреле, Татышлы ёросысь Вылысь Татышлыысь культурая дворецын Башкортостанысь удмуртъёслэн отчётно-выборной съездзы ортчиз. Ужрадэ Татышлы, Янаул, Калтасы, Балтач, Бурай, Кушнаренко, Ермекей, Илиш ёросъёсысь но Нефтекамскысь 105 делегатъёс вуизы. Съездлэн ужаз пыриськизы Татышлы ёрос администрациен кивалтӥсь Фанур Шайхисламов, Башкортостан Республикалэн Тӧроезлэн администрациысьтыз йӧскалык политикаез азинтонъя ёзэтэн кивалтӥсьлэн воштӥсез Ильшат Ханов, БР-ысь спортъя но егитъёслэн политиказыя министрлэн воштӥсез Эльза Карамурзина, БР-ысь Финн-угор калыкъёслэн ассамблеяенызы кивалтӥсь, БР-ысь Кун Собранилэн – Курултайлэн депутатэз Юлия Герасимова, Удмурт Элькунысь Госсоветлэн депутатэз, Вань удмуртъёслэн «Удмурт Кенеш» ассоциацизылэн президентэз Татьяна Ишматова, УР-ысь Йӧскалык политикая министерствоысь представитель Юлия Шахтина но мукетъёс.

Съездын Башкортостанысь удмуртъёслэн НКЦ-зылэн берло вить ар ӵоже ужамезлы йылпумъянъёс лэсьтӥзы. Та сярысь доклад лыдӟиз НКЦ-ен кивалтӥсь Салимьян Гарифуллин. Озьы ик докладъёсынызы тодматӥзы: истори наукаосъя доктор Ранус Садиков, Янаул ёросысь Каймашабаш школаысь удмурт кылъя но литературая дышетӥсь Ольга Давлетова, удмуртъёслэн ИКЦ-ысьтызы валтӥсь ӧнерчи Ирина Самигулова, Калтасы ёросысь Бадӟым Качак гурт поселенилэн администрациеныз кивалтӥсь Геннадий Хайдаршин, Ермкей ёросысь удмурт огазеяськонэн кивалтӥсь Анастасия Вождаева, Татышлы ёросысь Калмиярысь нылпи садэн кивалтӥсь Сазида Минияхметова, Янаул ёросысь Максим школаысь дышетӥсь Станислав Набиуллин но «Ошмес» газетлэн валтӥсь редакторез Ольга Нигаматуллина.

Съездын республикаямы улӥсь удмуртъёсын герӟаськем ужпумъёс эскериськизы: анай кылэз утён но дышетон, удмурт сям-йылолъёсты, лулчеберетэз азинтон, удмурт егитъёсты НКЦ-лэн ужаз кыскон но мукет. Ӝутэм ужпумъёс съездлэн резолюцияз пыртэмын.

Со сяна, съездын НКЦ-лэсь кивалтӥсьсэ бырйизы. Та ужез Татышлы ёросысь Улысь Балтач школалэн директорезлы Людвиг Зидымаковлы оскизы.

Кивалтӥсьлэн воштӥсезлы бырйизы Улысь Балтач гурт поселенилэн администрациеныз кивалтӥсез Эдуард Рахимзяновез, Янаул ёросысь удмурт огазеяськонэн кивалтӥсез Юрис Саитовез но Татышлы ёросысь Выль Татышлы гурт поселенилэн администрациеныз кивалтӥсез Николай Рахимьяновез.

НКЦ-лэн Кенешезлэсь ёзчизэ Ханиф Баймиевез «Почётный член Совета НКЦ удмуртов Башкортостана» дано нимен пусйизы.