Лул-сюлэмаз - ми: нылъёсыз, нунокъёсыз, соослэн нылпиоссы

Учконо ке, ӵужае котьмалы усто. Солэн котькыӵе ужлы киыз мынэ. Тэк пукемез ноку уг луы. Мукет сямен луыны но уг быгаты, дыр. Уго со пичиысен ик котьма ужлы дышыса будэмын.

Ӵужае, Камила Хатипова, вордӥськиз 1941-тӥ арын, шулдыр, Татышлы ёросысь нюлэсо но ошмесо Вязовка гуртын. Туж шулдыр но шундыё тулыс нуналэ. Музъем улӟон, будосъёс ӝужан, тылобурдоос чирдон вакытэ. Соку нокин ӧз тоды, куинь толэзь ортчыса, со ӵыдонтэм чебер нуналъёсты шимес Быдӟым Атыкай ож воштоз шуыса.

Ӵужае – ож вакытэ будэм нылпи. Солэн пичи, ненег дырыз война вакытэ но со бырем бере быдэс дуннеын сютэм улон аръёсы тупа. Асьсэ киынызы но кужыменызы будэтэм вань сиёнзэс соос шаерлы келяно луизы. Сиён тырмымтэен сэрен, шумприч, серекъясь ӵужае ӟигартэк кыле, валес вылын улоно луэ. Сыӵе ӝож ивор гуртэ чаляк вӧлме. Вераськонъёсты кылыса, кенакез солы пызен шыд вае. «Озьы мон пуксьыны ӟигар шедьтӥ. Собере атае сыргамес вузаса, ӝыны мешок пызь басьтыны быгатӥз. Мон пыд йылам султӥ», – вералляз мыным ӵужае.

Ӵужае семьяяз огназ ӧй вал. Соос куинь нылъёс но кык пиос будӥзы. Бадӟымез агайзы туж яратӥз вын-сузэръёссэ, мусояса, утьыса-возьмаса улӥз. Туж шулдыр, ог-огзэс дунъяса гинэ будӥзы пичиос. Но улон секыт луэмен, шунытэсь валесъёсын погылляськон интые, соослы туж вазь будоно, бадӟымъёс сьӧры кыстӥськоно, колхоз бусы ужъёс борды кутсконо луиз. «Куд-ог дыръя ымамы нянь пыры но уг шедьы вал, турын-куаръёслэсь гинэ шыд пӧзьтылӥм, – шуылӥз ӵужае,– нуназе кӧтлэн сюмамезлы чидатэк, кошкиськом вал колхоз бусыысь Залзак яре боры сиыны. Кӧня ке емышъёсты куртчем бере, выльысь берытскиськом вал бусые». Сютэм аръёс, секыт ужъёс ӵужайме юн кариськыны, ассэ кужмысь возьыны, ужез яратыны дышетӥзы.

Улонлэсь шӧгзэ но, кузьытсэ но адӟемын ӵужае. Кӧня чиданъёс пыр солы потоно луиз. Дышетскыны гинэ но йӧназ кылдымтэ бен. Школае ветлӥллям бускель гуртэ, векчи, урод дӥськутэн. Гужем-а, толалтэ-а – пыдазы котьку кутэн. «Толалтэ лымыез коласа мынӥськом вал, пыдъёс лызэктыса кынмо. Нош тулыс вуэмен тудӟем шур вамен потано луиськомы вал. Со кот пыдъёсын ик лумбытэн ветлылӥм. Воштӥськыны носкиосмы, колготкиосмы, пыдъёсмес биньыны огшоры басмаосмы гинэ но ӧй вал», – тодаз вайылэ ӵужае.

Озьы ке но ӵужае котькуд нунал школае туж яратыса ветлӥз, усто дышетскиз. Но адӟонлэсь уд пегӟы, шуо. Куатетӥ классын дыръяз, пыдзэ пуны куртчыса, ӵужае дышетсконзэ азьланьтыны ӧз быгаты ни. Соин ик пичи нылаш соку сьӧд сюй поттон дуре кошкыны турттэ. Капчи уг сётӥськы солы таиз малпанэз но. Уго паспорт басьтыны аресэз вуымтэ на вал, нош мукет улосвылэ документтэк уд кошкы, ужаны но сотэк уз кутэ. Но ӵужае амал шедьтэ. Мукет нылашлэсь паспортсэ курыса, со ужаны кошке ик. Пичияк коньдон поттон вылысь, выль дэрем басьтон понна трос тыршоно луэ. «Уйин одӥг часын кӧлыны бертӥськом но, куинь часын сайкаса, сюй поттыны мынӥськом ни вал», – вералля вал ӵужае.

Кык ар бере ӵужае вордскем гуртаз берытске. Гуртысьтыз ик пияшлы бызе. Кузпалэныз выль корка яна пото. Ньыль нылашъёсты вордо. Тани шумпотон нуналъёсыз вуизы ни кадь со доры. Но… Одӥг нуналэ улонэз нош ик чигиське – ӵужатае улонысь кошке. Шуг-секытъёсты вормыны дышыса будэмез соку ӵужаелы оло юрттӥз, оло нылъёсыз кайгулы сётскыны ӧз лэзе, ӵужае выльысен улыны дышетскиз.

Ужам ужъёсыз но ортчем сюресэз ӵужаелэн вераса быдтонтэм. Ас вакытаз аслэсьтыз пиналъёссэ будэтэмез, соослы ваньзылы вылӥ дышетскон сётэмез сяна, милемыз но, нунокъёссэ, пыд выламы султыны юрттӥз, улонэз валаны, ужез гажаны но яратыны дышетӥз. Секыт ке но вал, ӵужае котьку умоезлы оскыса улӥз.

Али ке но ӵужае висёнъёслы сётскытэк улыны тырше. Ымнырысьтыз пальпотонэз уг ышы, уг сӥя задор мылкыдыз. Укмыс нунокъёсызлэн но дас одӥг правнукъёсызлэн азинсконъёссылы, вормонъёссылы шумпотыса улэ. Бертылыкумы котьку ческыт пӧрамъёсыныз утялтэ.

26-тӥ южтолэзе ӵужаелы 80 арес тырме. Ӵужай, вань нылпиосыдлэн, внукъёсыдлэн, правнукъёсыдлэн, эмеспиосыдлэн но кенъёсыдлэн нимынызы тыныд тау карисько, юн тазалык сӥзисько! Та шулдыр шундыё тулыс нуналъёс шумпотон но капчи мылкыд гинэ мед кузьмалозы тыныд! Ымнырысьтыд шумпотон-серектонэд ноку медаз кысы! Яратӥськом!