«Улон каньыл, эшъёс, матысь адямиос ке вань»

- Мынам улон сюресэ вордскем шаереным герӟаськемын. Татышлы ёросысь Вылысь Татышлыын вордски. Татын ик ортчизы школа аръёсы. Уфаысь физкультурая техникумез, бӧрысь Ленинградысь физкультурая институтэз йылпумъяй. Служба аръёсы Байконурын ортчизы. Ужан сюресэ 18 аресам кутскиз: 1969-тӥ арын дышетскем школаям ужаны бертӥ, физкультурая дышетӥсь луыса. Уж аръёсы дышетон удысын, парторганизациын, культура удысын ортчизы. 1977-1981-тӥ аръёс: райкиносетьын, РДК-ын, Вылысь Татышлыысь 2-тӥ номеро школаын ужан.1981-тӥ арын монэ нош КПСС-лэн райкомаз ужаны вазизы. Татын 1987-тӥ арозь ужай. Вераны кулэ, райкомын ужакум мон адямиосын ужаны, соосын вераськыны, огкыл шедьтыны дыши. 1987-1990-тӥ аръёсы РДК-ын, ДЮСШ-ын тырши. 1990-тӥ арын 1-тӥ октябрьысен азинске культурая ёзэтын ужан сюресэ.

2015-тӥ арын Башкортостанысь удмуртъёслэн V съездазы удмуртъёслэн НКЦ-енызы кивалтӥсе бырйизы. Та ужме туннэ но быдэсъясько. 2016-2018-тӥ аръёсы «Ошмес» газетлэн редакторез луи. Котькуд уже улонам югыт пытьызэ кельтӥз.

- Зэм, кызь арлэсь кема культура удысын ужай: 1990-2003-тӥ но 2008-2016-тӥ аръёсы Татышлы ёросысь культурая ёзэтэн кивалтӥ. Крезьгурез яратон матысьёсылэсь пыӵамын, дыр. Атае тальянкаен шудэ вал, агае баянэн усто шудылӥз. Школаысь крезьгуръя дышетӥсьёс но пионеръёслэн юртсы бордын ужась баянъя кружокен кивалтӥсь Фасих Беркутов баянэн шудон мылкыдме эшшо но бурдъязы. Мынам крезьгурчи луон малпанэ кылдӥз. Тямыс класс бере Талгат эшеным Ижевскысь культпросветучилищее дышетскыны пырыны мынӥм. Милесьтым юазы, кыӵе музыкальной школаез йылпумъяды шуыса. Ми асьмеос гинэ баянэн шудыны дышемын вал. Милемыз кылзӥзы но дышетскыны ӧз басьтэ.

Вераме потэ на Вылысь Татышлыысь культурая дворец бордын ужась бальной эктонъя коллектив сярысь. Сое кылдытон сярысь сюлмаськиз со дыре культурая ёзэтэн кивалтӥсь Римма Султановна Нуриева. Отчы школаысь дышетӥсьёсты но вазизы. Вылысь Татышлыысь 2-тӥ номеро школаысь мон но Рамиля Мирзаяновна Нуриева эктыны ветлӥм. Коллективен кивалтонэз мыным оскизы. Юрттӥськисе луиз Рамиля Мирзаяновна. Римма Султановна Уфаысь дышетӥсьёсты вазиз. Бальной эктон сярысь ми трос выльзэ тодӥм. Коллективенымы кытчы гинэ ӧм вуэ! Бальной эктонъя республика, быдэсросси конкурсъёсы пыриським, трос вормонъёслы кузё луим. Со дыре Россиысь мукет гуртъёсын бальной эктонъя ансамбльёс ӧй вал на. Милям «Ари» ансамбльмы нырысетӥез луиз.

- Тодын. Мон соку школаын дышетскисько вал. Эшъёсыным эктон возьматӥмы. Но тужгес тодам кылиз физкультурая техникумез йылпумъям бере РДК-ысь сцена вылэ потэме. Ми ӵош дышетскем Альфира Шайхиеваен задор гуцульской эктон дасямы. Эктыны потӥм но, зал гур! серектӥз. Малы ке шуоно концертлэсь одӥг нунал азьвыл мынэсьтым йырсиме пилеш кельтыса басьтӥзы. Мон призывник вал угось. Эктонмы йылпумъяськем бере кужмо кичабонъёс кема чузъяськизы на. Мон туж шумпотӥ, нырысетӥез парен эктонмы усто пӧрмиз шуыса.

- 2001-тӥ арын Уфаын Россилэсь Президентсэ В. В. Путинэз пумитаны дасяськеммы туннэ кадь тодын. Татышлы ёрослы удмурт лулчеберетэз возьматыны ӵектэмын вал. Ужрадэ пыр-поч дасяським, ваньмыз усто пӧрмиз. Но мон понна паймымон луиз Калыкъёслэн эшъяськон памятниксы вӧзысь площадьлэн чеберлыкез. Отын республикаямы улӥсь котькуд калык яркыт возьматэмын вал. Культура удысын ужатозям сыӵе чебер, мур пуштросо ужрадэз адӟеме ӧй вал.

- «Ошмес» газетлэн редакторез луо шуыса, ноку уг малпаськы вал. Та ужез оскемзы мыным витьымтэ шорысь луиз. Редакциын ужасьёс понна но озьы вал, дыр. Нырысетӥ нуналысен ик асме мукет дуннеын кадь кожай. Малы ке шуоно мон литературной удмурт кылэз ноку ӧй дышеты, газет поттон ужлэсь но «кыдёкын» вал. Мон соку но вералляй, али но тау кылъёсме верасько со дырысь кылкутӥсь секретарьлы Ольга Борисовна Нигаматуллиналы, редакциын ужасьёслы, монэ валамзы, мыным юрттэмзы понна. Шумпотӥсько, ми огкыл шедьтӥм шуыса. Башкортостанысь удмуртъёсты огазеясь газетэз поттон бордын ӵошен ужамы. Али но озьы ужаськом. Газет бамъёс пыр республикаысь удмуртъёслэн национально-культурной центрзылэн, историяя но культурая центрлэн ужзы возьматӥське. Соин Башкортостанысь удмуртъёслы вазиськеме потэ, анай кылынымы газетмы азьланяз но мед ӧръяськоз шуыса. Асьмелэн одӥг девизмы луыны кулэ: «Ошмес» газет – котькуд семьяе».

- Та сярысь туж трос но кема вераськыны луэ. Национально-культурной центрез кылдытӥсьёс Ренат Галямшин, Юрис Саитов но удмурт огазеяськонэ пыриськисьёс аръёс ӵоже трос бадӟымесь ужъёс лэсьтӥллям. Удмурт лулчеберетэз азинтонын, вашкала сям-йылолъёсты улӟытонын, удмурт кылэз утёнын но азинтонын соослэн лэсьтэм ужъёссы номырин мертантэм. Соин асьмелы сое утён сярысь сюлмаськоно. Жаляса верано, берло дыре, Башкортостанысь мукет калыкъёс выллем ик, та валтӥсь ужпумъёсты быдэстонын шуг-секытъёсын пумиськоно луиськом. Башкортостанысь удмуртъёслэн VI съездазы, сое вуоно арын тулыс ортчытыны чакламын, одно ик удмурт кылэз но калыкез утёнъя концепция бордын ужано. Соин Башкортостанысь вань удмуртъёслы куронэн вазиськиськеме потэ: съездозь анай кылэз утёнэн герӟаськем малпанъёссэс мед шараялозы вал. Мылкыданъёстэс «Ошмес» газет пыр вераны быгатысалды.

- Семья сярысь ке верано, нырысетӥ семьяям Роза Зиннатовнаен 37 ар ӵоже шудо улӥм. Куинь нылпиослы улон кузьмам. Вераны кулэ, соосты визьноданэ кузпалы трос кужымзэ понӥз. Со понна мон солы пумтэм тау кылъёсме верасько. Нылпиосмы вылӥ тодон-валан басьтӥзы. Соос асьсэ семьяосынызы уло ни. Шумпотӥсько, Руслан но Рустам пиосы Вылысь Татышлыын уло но ужало шуыса. Камила нылы Уфаын улэ. Берлось 12 ар ӵоже мон кыкетӥ кузпалыным Лариса Леонидовнаен Улысь Балтачын улӥсько. Кузпалы врачебной амбулаториын ужа. Солэн кык нылъёсыз. Майя семьяеныз Первоуральскын улэ, Диана - семьяеныз Шудекын. Ми туж тупаса, одӥг бадӟым семья кадь улӥськом, нылпиосмес огкадь адӟиськом. Со понна Лариса Леонидовналы бадӟым тау шуисько. Праздникъёсын ми котьку ӵош. Азьпалан но озьы улыны мед гожтоз.

- Ваньмон дырлэсь кыӵе луэмзэ мон алигес валай. Азьло, оло, дырме шонер шыръяны быгатӥськымтэ-а меда? Райкомын ужаку шутэтскон нуналъёс ик ӧй вал. Суббота, воскресенье ке вуэ, фермае яке бусые эскеронъёсын потоно. Культура – со праздникъёс, фестивальёс, ужрадъёс но гожъяськон… Ваньмон дыр ке луэ, мон юртъер котырын утялскыны яратӥсько. Нош тунсыкъяськон сярысь ке верано, мынам хобби ӧвӧл. Чорыганы но, пӧйшураны но уг ветлӥськы, маркаос но уг люкаськы. Но вань мынам одӥг малпанэ. Берло дыре со сярысь ӵем малпаськисько: пичи музей лэсьтэме потэ – грамотаосыным, туспуктэмъёсыным, сувениръёсыным. Культура удысын ужакум мон трос интыосын луи, кунгож сьӧры но вуылӥ.

- Мылкыды спортэ котьку кыстӥськиз. Али но озьы ик. Ӵукналы быдэ 35-40 минут зарядка лэсьтӥсько. Ӝыт кӧлыны выдон азьын чылкыт омырен шоканы потасько.

- Кузпалы ческыт пӧра-пыжиське. Ваньзэ яратыса сиисько. Но вань сыӵе сиён, кудзэ мон ӵукналы быдэ 15 ар ӵоже сиисько ни. Со – овсянка. Та ӝукез кузпалы вуын пӧзьтэ, мон йӧл яке йӧлпыд, изюм, грецкой мульы яке арахис, куддыръя варення ватсасько. Туж пайдаё сиён.

- Туж шер. Куноын яке сюлмын мӧзмыт луыку, шуг-секытъёс зӥбыку.

- Улонэз кык пол ортчыны луысал ке, кык секыт дыръёсты воштысал: 20 аресам анайме ыштэм минутъёсты но Роза Зиннатовналэсь улонысь кошкем дырзэ. Мукетыз озьы ик кыльысал. Инмарлы тау шуисько, улон сюресам ӟеч адямиос пумиськылӥзы. Пӧлазы кивалтӥсьёс но, огшоры адямиос но вань: соос котькудзы юрттэт кизэс сётыны дась. Бадӟым тау эшъёсылы. Мон котьку шӧдӥ, али но шӧдӥсько, ми ӵошен, одӥг герӟетын шуыса. Озьыен, улон азьланьтӥське. Улон каньыл, эшъёс, матысь адямиос ке вань.

Ваньдэс вуись Выль 2021-тӥ арен ӟечкыламе потэ. Тазалык, тупаса улон сӥзисько. Котькӧня арес ке но луиз, улон сюресады тӥледыз выль вормонъёс мед витёзы. Матысь адямиосыныды шудо луэ.

- Бадӟым тау.