Шудо анай, кузпал но песяй

Анай луон макем бадӟым шуд шуыса, нылпи вордэм бере гинэ валаськод. Нуны – со пумтэм шумпотон, ноку кысӥсьтэм яратон. Татышлы ёросысь Калмияр гуртын улӥсь Лилия Хайдаршина – куинь полэс анай: солэн кык пиосыз но нылыз. Со сяна, сое Стелла внучкаез шумпоттэ на.

- Лилия Тимураевна, тӥ асьтэды шудоен лыдъяськоды-а?

- Мон туж шудо…

Лилия но Фёдор Хайдаршинъёслэн семьязы 1986-тӥ арын кылдэм. Солэсь азьвыл яратӥсь сюлэмъёс вить ар ӵоже эшъяськиллям. Ог-огзэс соос пичиысен тодыса будӥллям, угось артэ гинэ интыяськем гуртъёсын вордӥськиллям, Фёдор Бадрисламович - Калмиярын, Лилия Тимураевна – Петропавловкаын, одӥг школаын дышетскиллям. Фёдор Бадрисламовичез армие басьтэм беразы, егитъёс гожтэтъёс пыр кусып возьыса, яратонзэс утиллям. Федя агайлэн служба аръёсыз Германиын ортчиллям. Служить карем интыез Федя агайлы туж кельше вылэм. Отчы кыльыны малпанэз но луэм. Лилия апай со доры мыныны дась вылэм. Семьяязы со пиос пӧлын пичиез луэмен, анайзэ утьыны кулэ луоз шуыса, бертоно кариськем. «Анаен тупаса одӥг коркан ми 29 ар ӵоже улӥм. Со милям кенешчимы но, юрттӥсьмы но, ужаны бурдъясьмы но вал. Жаляса верано, али со пӧламы ӧвӧл ни. Но ми сое ум вунэтӥське, котьку тодамы ваиськом. Бадӟым тау солы ваньмыз понна», - кузпалызлэн анаез, Фаргайша апай, сярысь вера Лилия апай.

Лилия Тимураевна Чайковскийысь медучилищеез йылпумъям. 1988-тӥ арын со Калмиярысь медпунктын фельдшер луыса ужаны кутскем. Собере Петропавловкаысь медпунктэ ужаны выжем. Сое ворсам беразы, Калмиярысь ФАП-ын фельдшер луыса ужа. Солэн ужез – адямиос, соослэн тазалыксы сярысь сюлмаськон. «Быръем ужме туж яратӥсько. Ужам йырыным, пыдыным «чумисько», ваньзэ мукетсэ вунэтӥсько. Дорысь ужъёсты троссэ Федя, нылпиос быдэсъяло», - вера фельдшер. Хайдаршинъёслэн нылпиоссы но анайзылэсь уж сюрессэ бырйиллям. Бадӟым пизы Игорь - пинь эмъясь. Со Анастасия кузпалыныз Сыктывкарын улэ. Екатерина но агаезлэн тодон-валан басьтэм юртаз, Ижевскысь медакадемиын, пинь эмъясьлы дышетске. «Рома пимы атаез борды кыстӥськиз, техникаен вырыны яратэ. Со электриклы тодон-валан басьтӥз. Вахта амалэн Сыктывкарын ужа. Нош дорын дыръякуз – Федя вӧзын, автосервисын. Анюта кенмы заочно экономистлы дышетске. Шумпотӥськом, нылпиосмы пичиысен туж эшъяськыса будӥзы. Али но соос огзы понна огзы котьма лэсьтыны дась», - вера Лилия апай. Фёдор Бадрисламович азьло гурт хозяйствоын водительын тыршем, КамАЗ машинаен ужам. Со аръёсы Хайдаршинъёс аспӧртэм проектэн выль корка пуктӥллям. «Сельская новь» журналысь туж чебер корка син шорамы йӧтӥз. Ӝутоно коркамылэсь проектсэ но со выллемгес карыны кенешим», - шуэ Лилия апай. Техникаез ӟеч вала бере, Фёдор Бадрисламович гуртазы машинаосты тупатон станция усьтэм. «Ужтэк уг пуко, вазиськисьёс котьку вань», - вера Л. Хайдаршина.

- Фельдшерлэн ужез сыӵе, бер ӝыт но, уйин но юрттэт курыса вазиськисьёс луо. Семьядылы, нылпиостылы дыр кызьы шедьтӥськоды? - юасько солэсь.

- Вазь ӵукна. Котькуд нуналме яратоно адямиосылы шуныт кылъёс вераса кутскыны тыршисько. Нылпиос школаын дыръя, бертоназы запискаос гожтыса кельтӥсько вал, - вера со.

Лилия апай суредаськыны, пе, туж яратӥсько. Ваньмон дырыз луыку, со внучкаеныз, Стеллаен, ӵош суредаське. Со сяна, сад-бакча, сяськаос будэтыны, утялтыны яратэ на. «Сад будэтон, муш вордон – семьямылэн яратоно ужъёсыз. Федяослэн юртсы азьло мукет интыын вал. Сад будэтон понна, шурлэсь кыдёкынгес мед луоз шуыса, гурезь вылэ инты басьтыса, отчы корка пуктӥм», - вера кышномурт. Будосъёссы Хайдаршинъёсты тулыс но гужем сяськаосынызы, сӥзьыл емышъёсынызы шумпотто.

Лилия Тимураевналэн котьку малпанэз вылэм – вӧзаз оскымон, котьма ужез быгатӥсь кузпал мед луоз. Аслаз атаез улонысь туж вазен кошкем уго. Малпанэз солэн быдэсмем, вӧзаз – оскымон адямиос, туннэ нуналэ со – шудо кузпал, анай но песяй.

Миляуша БУЛАТОВА.

Татышлы ёрос.