Одӥг семьяын пӧртэм сямъёс

- Радиф армиысь бертэм бере паръяським. Выль кенлы лушкаса ваизы.Соку мыным 22 арес вал. Бигеръёслэн йылолзыя никах укытӥзы, - выль семьяе вуэмзэ тодаз вайыса вера Надя апай.

Кузпалъёс кыксы ик ужан сюрессэс гурт удыслы сӥзизы. Надежда Шамсиахметовналы, та вакытэ гуртын будэм тросэз нылпиос выллем, пиналысен ужлэсь шӧмзэ веръяса будоно луэм. Дас ньыль аресаз со фермае ужаны кутскем. «Ыжъёсты возьмай, сизьыметӥ классэз йылпумъям бере одӥг гужемзэ торфие ветлӥ. Отысь бертыса выльысь фермае вамыштӥ. Парсь, ветыл, ыж ути, - вера Надя апай. - Уждуре вить часын мыномы вал. Ыжпиослы нянез ымын кушаса сюдылӥмы, ведра-карнанэн ву ворттыса люктамы. Одӥг висъетын 80-лы матэ ыжъёс утимы. Ыжпиосмы трос луизы ке, одӥг ыжпилы одӥг манет уксё сёто вал». Ферма ужлэсь вормонтэм секытлыкъёссэ вераса уг быдты Надя апай. Вань ужъёсты соку уго киын быдэсъяно луиз.

- Пудолэсь кыедзэ кораса поттылӥмы. Октэм кушманэз куроен согылыса бусые кельтылӥзы. Сое валэн ворттомы вал. Силос но бусыын луылӥз. Скирдъёсты вырӟытъяны ум быгатӥське вал, - азинтэ со веранзэ. Азьвыл аръёсы ужамезлэн пытьыосыз кышномуртлэн тазалыкез вылын но шӧдӥсько. Нянь кушаса пиньёс быризы, ыжъёслэн кизьзы синъёсты, пе, быдтӥз.

Радиф Зиякаевичез вордӥськем гуртэзлэсь Мурманскын, Заполярьеын службазэ ортчонэз но отысен комсомол путёвкаен Сургутын стройкаын куинь ар ужанэз гинэ люкизы. Ужысьтыз солы анаезлэн тазалыкез лябӟемен бертоно луиз.

- Гуртэ бертэм бере Вуж Балтаче трактористлы дышетскыны пыри. Одӥг ар тодон-валан люкаса, колхозэ ужаны кутски. Механизаторын дас вить ар тырши, - вера Радиф Хатипов. – Соку ю удалтэ вал. Уй но нунал ужамы.

- Уйин но турын вайыны уг луы вал, - ватсаса вера на Надя апай.

Радиф агайлэсь кема аръёс ӵоже тыршем тракторзэ берло ужаны ярантэмен лыдъязы. Корт эшезлэсь люкиськемез бере, со пудо утён удысэ вамыштӥз. Нош шутэтскыны потон азяз Радиф Зиякаевич колхозын пӧзьтӥськисьын ужаз. Бусы ужасьёсты ческыт сиёнэн кунояз. Туннэ нуналэ но Хатиповъёслэн куноян мылкыдзы уг сӥя на. «Удмуртъёсты но, бигеръёсты но куное ӧтьылӥськом. Курбан-байрам праздникез ортчытӥськом, ураза кутӥськом», - верало кузпалъёс.

Хатиповъёс ньыль нылпи будэтӥзы. Вадис, Венер, Ильфат пиоссы гуртэ интыяськизы, Илюса нылзы - Вуж Балтаче. Котькудзы, анай-атайзы выллем, чебер семья кылдытыса асьсэ понназы уло. Венерен Ильфат пиоссы палэнэ ветлыса ужало, нош Вадис пизы анай-атаезлэн сюрестӥз вамыштӥз. Со гурт удысын тырше. Фидания, Альфира но Раушания кенъёссы – дышетӥсьёс. Илюса нылзы ёросысьтызы эмъюртын санитаркаын тырше, Азат эмеспизы – Уйпалан. Сюлэм шунытсэс кузьмаса будэтэм анай-атайзэс уг вунэто соос, доразы ӵем вуыло. Нош Надя апай но Радиф агай нылпиоссэс котьку шумпотыса пумитало.